Diálogu Iha Likisa, Horta Hatan Bá ‘’Issue’’ GAM

Jornalísta : Arménio //

G-RTV.com (Likisa) : Tama ba kampaña eleisaun segundu volta, Kandidatu Prezidente Repúblika 2022-2027, José Manuel Ramos-Horta, hala’o de’it diálogu iha munisípiu Likisa, hodi hatudu respeita bá igreja katólika iha âmbitu kuarezmál ne’e.

Kandidatu ho númeru sorteiu 1 ne’e, kontinua hato’o nia programa liu husi kampaña ho tipu diálogu ne’e, hodi hatan bá ‘’issue’’ Grupu Arte Marsiais (GAM).

‘’Ha’u sei la taka GAM, oinsá bele halo diálogu ho sira, servisu hamutuk ho polísia, oinsa lori sira atu kontribui ba dezenvolvimentu no labele halo inan feton sira hakfodak’’ Dehan Horta iha sede municipal partidu CNRT, munisípiu Likisa, 03/04/2022.

Antes ne’e, liu husi entrevista ho média nasionál balun, Horta hateten, la aseita ho jóvem husi membru GAM sira ne’ebé hakur ilegalmente husi fronteira Timor ba provínsia Kupang (Indonézia) hodi hasa’e sintu.

Nia hatutan tan, ‘’Ha’u sei halo diálogu ho entidade polítiku no ema hotu, inklui igreja no jóvem sira, atu nune’e estadu ida ne’e tenke tau matan bá jóvem sira, kosok-oan no inan sira’’.

Iha diálogu ne’e, hetan partisipsaun máxima husi dirijente apoiante husi aldeia to’o nivél munisípiu, inklui estrutura nasionál partidu CNRT, PD, PDRT, PATIFOR, PUDD, PST, FRENTE MUDANSA, PDC no movimentu apoiante sira.

Iha primeira volta, munisípiu Likisa oferese votu 20 mill resin ba Kandidatu Prezidente, Ramos Horta ne’ebé sai manan na’in entre kandidatu na’in 15.

Entretantu, diálogu refere, hetan seguransa máxima husi PNTL no observa direta husi entidade observadór nasionál no internasionál.

(REMATA)