Diversifika Ekonomia Uma-Laran, Grupu Ai-Mate Laran Hamri’ik Ho Kondisaun Mínimu

Jornalísta : Júlio Paixão //

G-RTV.com (Ainaru) : Liu husi programa média tour ne’ebé organiza husi NGO OXFAM Timor Leste servisu hamutuk ho AJTL no Lafaek News, no finansia husi Autralia Aid, lori jornalísta nasionál sira to’o iha baze hodi halo kobertura bá grupu vulnerável sira ne’ebé hala’o servisu iha area rurál.

Iha oportunidade ne’e, jornalísta média G-RTV.com hasoru malu ho grupu Ai-Mate Laran hodi koalia konabá objetividade ezisténsia grupu agrikultura ne’e.

Nune’e tuir grupu ne’e katak, atu diversifika ekonomia uma laran, obriga Grupu Ai-Mate Laran husi munisípiu Ainaru hamriik ho nia area servisu iha agrikultura no ho kondisaun ne’ebé mínimu.

Xefe grupu, Domingos da Costa Neves, hateten, grupu ne’e hahu iha tinan 2019 to agora no rendementu di’ák ba sira nia grupu maske hetan oituan.

“Ami nia grupu halo to’os, hamutuk ema na’in 15, feto iha na’in 5 no mane iha 10,  komesa ho kuda ai-manas, brinzela no tomate hamutuk  ho plantasaun sira seluk hanesan has kulu jaka no nu’u, no to’o oras ne’e iha rendimentu di’ák,” Dehan domingos, iha Dolok, Suku Foho-Ailico, Postu-Administrativu Hatudo, Munisípiu Ainaru

Durante ezisténsia Grupu, halo ona proposta no hatama  bá sentru juventude munisípiu Ainaro no nia rezultadu hetan ajudu $500 USD, ida ne’e responde bá ekipamentu servisu agrikultura hodi hala’o servisu maske hetan dejafiu oin-oin hanesan bé ne’ebé sempre maran iha tempu bai-loron maibé grupu ne’e esforsu-an ba kuru be iha mota maske do’ok, Katak Nia.

Iha fatin hanesan, Ólavia Adão nu’udár feto ne’ebé servisu  iha grupu ne’e, konfesa, ” Ha’u sente kontete tebes tama iha grupu ne’e tambá hodi ajuda ha’u nia família no ha’u nia oan sira nia eskola maske hetan osan ne’ebé ki’ik ha’u iha ajuda maluk mane sira hodi kuru no hamos modo nia Du’ut,” Konfesa Feto agrikultura ne’ebé sempre esforsu bá grupu ne’e rasik.

Tuir observasaun iha baze, grupu ne’e nia atividade la’o ho kondisaun ne’ebé vulneravel tebes, liu-liu ekipamentu ne’ebé la sufisiente, oportunidade bá merkadu ladun iha, prezervasaun bé ne’ebé menus iha tempu bailoron maibé grupu ne’e sempre dezaraska liu husi meiu oi-oin hodi kontinua ezíste.

(REMATA).