G-NEWS (MANUFAHI) – Ekipa autoridade protesaun sivil (APC) Munisípiu Manufahi, segunda-feira (08/05) orseik, hala’o Evakuasaun ba komunidade afetadu husi korénti mota laklu, iha aldeia kalokau suku uma berloik Postu administrativu Alas.
Komandante operasaun Autoridade protesaun sivil (APC) Munisípiu Manufahi, inspetúr polísia Nívio Jerónimio Baptista iha fatin akontesementu hateten, udan bo’ot hahú Sábadu fín semana (06/05) to’o segunda-feira (08/05) ohin, korénti mota laklu tama komunidade sira nia hela iha aldeia Kolokau, fó ameasa ba komunidade sira nia vida. Tanba ne’e ohin ekipa halo ona Evakuasaun ba komunidade uma ka’in 5 kompostu inan faluk 1 ho labarik na’in 5 bebé na’in 3 inklui ema ho defisiente na’in 1 ba fatin segúru, iha prosésu Evakuasaun ne’e nafatin akontese, kontinua fó ameasa ba komunidade sira nia vida, provizorimente ita sálva uluk komunidade ne’ebé rísku husi korénti mota ba fatin segúru.
Nia hateten, iha prosésu evakuasaun ne’e ekipa identifika uma uma 40 maka afetadu maibé provizóriu uma ka’in 10 maka bee tama to’o uma laran, bee tama komunidade nia to’os, animal hakiak balun bee lori, komunidade nia bee posu kontamina ho tahu teen, estudante sira nia kadernu hetan estrágu, inklui labarik sira hetan moras ain katar tanba bee fo’er.
” Ohin komandante APC molok halo Evakuasaun, halo kedas koordenasaun ho Administradór Munisípiu, no Administradór orenta kedas diretúr obras públika atu kordena ho institutu jestaun ekipamentu IP, Atu fasilita eskavatór hodi normaliza korénti mota laklo, nune’e korénti mota halai tuir ninia dalan, la fó risku ba komunidade sira” Nívio informa”.
Komandante Nívio akresénta, maiória komunidade afetadu sira la ezizi Ai-haan maibé sira ezizi liu, maka governu aumenta tan halo barajem mota nune’e la fó rísku tan ba komunidade sira.
Xefe aldeia kolokau Francisco Fernandes relata, komunidade aldeia kolokau iha uma ka’in 100 resin kada tinan korénti mota sempre sobu komunidade sira nia hela fatin. Ho akontesementu ida ne’e iha sábadu to’o ohin, rezultadu komunidade uma ka’in 40 maka korénti tama sira nia uma, inklui halo estrágu ba ai-horis inklui animal hakiak.
“Ami ezizi ba estadu atu aumenta tan bareiras iha mota laklu nian, tanba korénti mota halai tuir fali mota ninin ne’ebé ladauk hari’i barajem, hodi sobu komunidade nia hela fatin” subliña sefi aldeia”.
Entertantu tuir observasaun iha terenu, ekipa APC halo Evakuasaun ba komunidade sira, ekipa mós informa ba komunidade sira atu ses-an provizóriu ba fatin segúru, hodi salva an husi mota. Iha prosésu Evakuasaun ne’e hahú oras tuku 31:00 meudia remata iha oras tuku 17:30, maibé bee kontinua aumenta ba beibeik tama komunidade nia hela fatin.
Informa mós katak, lideransa komunitária hamutuk ho APC identifika ona sede suku Umaberloik, atu halo Evakuasaun komunidade ho skala bo’ot, Enkontru udan kontinua akontese.
Ekipa protesaun sivil ne’ebé ohin halo prosésu Evakuasaun ba komunidade afetadu sira, kompostu ekipa APC, Korpu bombeiros, ekipa protesaun sivil administrasaun Munisípiu inklui mídia sira
Jornalista : Júlio Guterres
Editór Testu : Amito Qonusere Araújo
loading="lazy" />