G-NEWS (SOIBADA) – Prezidénsia Repúblika Kuarta-Feira ne’e, apoia nesessidade bázika ba família kbi’it laek 10, inklui uma-kain rua ne’ebé afetadu husi dezastre naturais ne’ebé akontese iha Dezembru tinan 2022, iha Postu Administrativu Soibada, Munisípiu Manatuto.
Nesessidade bázika hanesan fós, supermi no seluk tan,entrega direita husi Adjunta Xefe Kaza Sivíl, Henriqueta Maria da Silva ba uma-kain 10.
“Sasán ne’e mai husi Prezidente Repúblika, José Ramos-Horta, atu tulun ba família kbiit laek sira, atu nune’e bele hakmaan sira-nia nesesidade lor-loron nian,” hatete Adjunta Kaza Sivíl.
Teresinha Sarmento, lori família kbi’it laek nia naran agradese ba Xefe Estadu, José Ramos-Horta, tanba bele tulun ona ai-han nesessidade bázika ba sira iha situasaun difísil ida-ne’e.
“Ha’u kontente no hato’o agradese ba Prezidente Repúbklika, José Ramos-Horta husu tulun ba Nossa Senhora Aitara, atu tulun nafatin Prezidente Repúblika, hodi tau matan nafatin ba família kbiit la’ek sira,” hateten nia.
Almerino Quintão, Vítima husi akontesimentu dezastre naturais iha 31 Dezembru 2022, mós agradese ba Xefe Estadu, tanba bele fó ona apoiu nesessidade bázika ba sira.
“Dezastre naturais ne’e akontese iha fulan dezembru tinan kotuk no sorti akontese iha parte loron maka ami halai sai husi uma laran, maka akontese kalan karik ami labele sai no ami bele hetan mós kanek. Hau agradese ba ekipa husi Presidensia Republika mai fo apoiu nesesidade bazika ba ami,” agradese Almerino.
Familia uma-ka’in ne’ebé maka hetan apoiu husi Prezidénsia Repúblika mai husi suku Samoro, Leohat, Manlala no Manufahi Kiik.
Jornalista : Ekipa G-News
Editór Testu : Amito Qonusere Araújo
loading="lazy" />