G-RTV.com : Líder Nasionál, Atuál Sekretáriu Jerál Partidu Frente Revolusionário Timor Leste Independente (FRETILIN), Mari Bin Amude Alktiri, to’o hikas Timor Leste, iha loron 27/01/2022, hafoin viázem ba nasaun Portugál ho objetivu atu festeja tinan foun 2022 ho família iha fulan Dezembru liu ba.
Bainhira to’o iha Timor Leste ho aviaun Citilink, iha aeroportu Nicolao Lobato, Sekretáriu jerál FRETILIN ne’e simu direta husi membru Komité Sentrál FRETILIN (CCF-Sigla Português) hafoin diretamente ba kedas CCF (Comoro) halo konferénsia imprensa ho média.
Iha konferénsia imprensa ne’e, Alkatiri deklara sei simu atuál Tenente Jenerál Lere Anan Timur (LAT) bainhira fila mai CCF.
‘’Ha’u rekoñese LAT hanesan membru CCF, ha’u hatene katak Jenerál sei mai nia uma, ha’u sei simu nia’’. Deklara Eis-Primeiru Ministru ne’e.
Alkatiri hatan nune’e relasiona ho deklarasaun LAT nian ne’ebé iha semana balun liu ba katak , baihira reforma husi militar sei ba nia knu’a FRETILIN no husu nia kartaun militante.
Além ida ne’e, eis-Prezidente RAEOA/ZEEMS moos afirma la nega líder nasionál Kay Rala Xanana Gusmão.
‘’Xanana ha’u la halai husi nia, ha’u nunka nega Xanana nia funsaun, ha’u ho Xanana ne’e iha diferensa hanoin no la gosta sona ema husi kotuk, buat ne’ebé sala, ha’u koalia iha oin’’. Afirma Alkatiri.
Iha konferénsia imprensa ne’e, Mari Alkatiri, halo apelu ida atu líder nasionál sira hamutuk atu konsolida páz no estabilidade iha tempu eleisaun ne’e, tambá tempu ona atu jerasaun 74/75 buka halibur malu hodi halo balansu bá Timor Leste hafoin restaura independénsia hodi hatene momos se mak iha asaun barak no koalia barak.
Oportunidade ida ne’e, Sekretáriu Jerál esklarese pozisaun FRETILIN atu apoiu kandidatu Prezidente Franscisco Guterres Lú-Olo hanesan prezidente partidu Fretilin hodi kompete iha eleisaun prezidensiál tinan ne’e, no desijaun atu apoiu statutu fo dalan la liu husi kongressu ida.
Jornalista : Arménio.
Editór : Ekipa G-RTV.com
loading="lazy" />