Jornalísta : Arménio //
G-RTV.com (Ermera) : Partidu CNRT liu husi Sekretáriu Jerál Francisco Kalbuadi Lay hala’o abertura bá konsolidasaun nível munisipál hodi konsolida forsa bá eleisaun parlamentár ne’ebé sei mai iha munisípiu Ermera, Sábadu, 02/07/2022.
Iha abertura konsolidasaun ne’e, CNRT agradese bá apoiu 46 mill votu husi sidadaun eleitór, militante, apoiante, movimentu inklui aliadu partidu polítiku iha ermera ne’ebé fó sussesu no vitória ba kandidatu José Ramos-Horta iha eleisaun prezidensiál (ELPREZ) 2022 liu ba.
‘’Agradese bá Maromak no Lori Maun Bo’ot Xanana Gusmão inklui partidu nia naran hato’o ami nia obrigadu ba ita bo’ot sira ba vitória ELPREZ 2022 liu ba, tambá ita hotu konsege lori duni ita nia maun Horta ba Prezidente Repúblika períodu 2022-2027, importante liu tan la’ós de’it agradese malu maibé tenke konxiénte katak votu ka manan ida ne’e mai husi povu tomak,’’ Dehan SEKJE CNRT Francisco Kalbuadi Lay, iha abertura konsolidasaun munisipál Ermera, ne’ebé hala’o iha salaun parokiál Gleno.
‘’Tambá ne’e ita tenke tané fiar ne’ebé povu fó ona mai ita liu husi ELPREZ 2022, maibé klaru tenke rekoñese mos katak votu ne’ebé ita hetan mai husi apoiu aliadu sira nian inklui movimentu lubuk ida,’’ Deklarasaun kontinua husi SEKJE ne’e.
Nia afirma liu tan, ho abertura konsolidasaun ne’e bele hametin liu tan estrutura iha baze hodi hasoru eleisaun parlamentár ne’ebé sei mai.
‘’Ohin mos ita konsolida atu hametin estrutura iha baze hodi hasoru eleisaun ida importante mak eleisaun parlamentar, tenke prontu no hametin abut iha baze, no atu fó liamenon katak ita lori ona Horta ba Prezidente Repúblika, agora ita tenke lori fali Prezidente CNRT Xanana bá Primeiru Ministru (PM) atu hametin liu tan estadu ida forte no hala’o dezenvolvimentu,’’ Afirma Lay.
Iha Fatin hanesan, koordenadór jerál partidu CNRT munisípiu Ermera, Dominggos Lemos reforsa tan, ‘’Reprezenta Koordenadór kampaña munisípiu Ermera nian hato’o agradesimentu bá ita hotu, no ha’u fiar katak ho situasaun sira ne’ebé ita liu ba dadaun ne’e sai referénsia ida atu hakat ba oin hodi alkansa objetivu ida mak lori Prezidente Partidu bá Primeiru Ministru’’ Katat Koordenadór ne’e.
Partisipa iha eventu partidaria ne’e, mai husi estrutura nasionál, organizasaun afiliadu partidu, reprezentante partidu aliadu inklui movimentu sira ne’ebé foin lalais ne’e apoiu CNRT nia kandidatu iha ELPREZ 2022.
(REMATA).
loading="lazy" />