G-RTV News (20/04/2021): Ministériu Transporte no Komunikasaun liu husi Autoriedade Nasionál Komunikasaun (ANC-Sigla Português) Tersa-Feira ohin, distribui sertifikadu rezistrasaun ho númeru 003 ba Globalnet Unipessoál LDA, nu’udár kompañia fornesedór liña Internet.
Husi sertifikadu rezistrasaun ne’ebé iha, fasilita ona kompañia fornesedór liña Internet inklui Globalnet atu hala’o servisu fornesimentu liña Internet ba públiku.
‘’Ohin Ita atribui tan sertifikadu rezistu ba kompañia Globalnet atu fasilita kompañia sira, hodi fo serteja ba sira nia ezisténsia operasionál atu ajuda fornese liña Internet ba públiku’’ klarifika Ministru Transporte no Komunikasaun José Agustinho iha sala distribuisaun Sertifikadu ANC, Tersa-feira ohin.(20/04).
Guvernante ne’ebé mai husi Partidu KHUNTO, fo esplikasaun tan katak ho baze dekretu Lei númeru 15 artigu 30 fo oportunidade ba kompañia fornesedór liña internet sira atu bele rezista tuir dekretu Lei haruka.
‘’Tuir dekretu Lei númeru 15/30 fo oportunidade ba kompañia fornesedór liña Internet atu bele rezista tuir rekézitus ne’ebé dekretu Lei haruka’’ haktuir Nia.
Eis-Deputadu iha períodu tinan 2017 ne’e, fo mensájem katak konabá ezisténsia kompañia ne’ebé rezistradu tenke kontribui ba guvernu liu-liu oinsa rekolha reseitas husi kompañia no rezistrasaun ne’e sira bele hala’o ona servisu tuir profesionalidade.
Iha fatin hanesan, Reprezentante Kompañia Globalnet, Alexandre Pires Mendes afirma katak sente agredesidu tamba guvernu bele halibur kompañia fornesedór sira no fo rekoñesimentu liu husi sertifikadu rezistrasaun.
‘’Ami sente agradesidu tebes tamba guvernu bele halibur ami no iha prossesu ne’e ami bele alkansa legálidade ne’ebé iha liu husi distribuisaun Sertifikadu rezistu nian no prontu ona atu hala’o servisu’’ Afirma Nia.
Konabá ekipamentu ne’ebé sei prende husi parte Polísia nian, fontes ne’e fó razaun katak sei nafatin ho ANC atu halo advokasia ba ekipamentu ne’ebé sei iha parte justisa nian nian.
‘’Ne’e hanesan parte inísiu ida ne’ebé di’ák tebes, ami sei servisu hamutuk ho parte ANC atu halo advokasia ho parte justisa hodi justifika ami nia sertikasaun ne’e, hodi nune’e parte advogadu bele haree prossesu ida ne’e ba oin’’, espressa nia.
Antes ne’e iha semana balun liu ba, MTK-ANC distribui ona sertifikadu ne’ebé hanesan ba kompañia fornesedór liña Internet ho naran Gadamor-ISP (001) no Metrolink (002).
Jornalista : Arménio.
loading="lazy" />