G-NEWS (DILI) – Diretóra Rádiu Rakambia, Dili Cristiana Ximenes Belo, la aseita ho desizaun STAE ne’ebéla autoriza Jornalista sira hosi mídia privadu, labele vota livre iha eleisaun Parlamentár, ne’ebé sei akontese iha loron 21 fulan Maiu tinan 2023.
“Se Lei la fó autorizasaun ba Jornalista vota livre, tenki aplika mos ba RTTL no Tatoli tanba sira mós Journalista ne’ebé hela iha Nasaun RDTL. RTTL no Tatoli nia Jornalista la mai hosi nasaun seluk, sira mós hanesan Jornalista sira seluk ita iha planeta ida deit mak Timor-Leste”, Nia informa ba G-News, Kuarta-Feira (12042023).
Tuir Nia, Jornalista sira hosi Mídia Estatal bele vota livre iha fatin ne’ebé deit, tanba sá mak Jornalista sira seluk labele.
“Ha’u hare notísia hosi Tatoli fó sai maibé la iha klaridade tanba lei artigu hira mak fó deit oportunidade ba RTTL no Tatoli? No Artigu hira mak fo limitasaun ba Jornalista sira seluk. Se lei ne’e mak eziste duni hamosu injustisa sosiál hasoru journalista sira seluk”, Nia lamenta.
“Sim, ne’e deskriminasaun boot hamosu injustisa sosiál hasoru Jornalista sira seluk. Tanba fó limitasaun ba Jornalista sira seluk, ita bele konsidera katak liberdade de imprensa mós sira sei halakon iha Timor Leste, tanba STAE hahú ona limita no halakon oportunidade liberdade de imprensa. Se parte husi Governu konsidera deit mídia RTTL no Tatoli mak hanesan mídia iha Timor-Leste entaun mídia sira seluk ne’ebé durante eziste fó apoiu ba dezenvolvementu ne’e sira la sura nia kontribuisaun no sakrifísiu”, Cristiana aumenta tán.
Diretórs Rádiu Rakambia ne’e sujere ba STAE atu bele konsidera mós mídia sira seluk ne’ebé durante fó apoiu másimu ba dezenvolvementu iha nasaun ne’e. Tanba mídia mak sai ponte, matan, tilun no ibun ba ema lian laek sira no hatutan susesu ne’ebé governu Timor-Leste iha ba públiku. Jornalista sira seluk mós durante ne’e halo nia kna’ar ho profesionalismu, laos RTTL no Tatoli nia Jornalista deit.
“Tanba ne’e dala ida tan husu ba STAE avansa fali ho lei ne’ebé uluk iha eleisaun Presidensial uza hodi fó oportunidade ba Jornalista sira hotu hodi hala’o nia kna’ar hodi apoiu dezenvolvementu iha festa demokralásia ida ne’e”, Diretóra ne’e hakotu.
Jornalista : Ekipa G-News
Editór Testu : Amito Qonusere Araújo
loading="lazy" />