Hasoru Horta, Paixão Simu Órdem Atu Hadia Di’ák Liu Tan Kooperasaun Exeterior

Jornalísta : Arménio //

G-RTV.com (Dili) : Ministru Defeza ba dala-uluk hasoru malu ho Prezidente Repúblika José Ramos-Horta nu’udár komadante supremu Forsa Defeza (F-FDTL) hafoin simu posse iha loron 20/05/2022.

Ministru Defeza, Jenerál (REF) Filomeno Paixão esplika, hasoru malu ida ne’e ajenda urjente ne’ebé Primeiru Ministru Taur Matan Ruak mak orienta.

“Ohin PM Taur Matan Ruak haruka ha’u mai hasoru PR hodi hato’o situasaun relasiona ho situasaun Defeza iha F-FDTL,’’ Dehan Filomeno Paixão iha Palacio Prezidente Ai-Tarak-Laran, ohin, 01/06/2022.

Hanesan Komadante Supremu, PR fó órdem “tenke halo di’ák kooperasaun estadu ho rai-liur (Exterior) inklui paíz bo’ot sira ne’ebé fó ona apoiu hanesan Amérika, Australia, Xina no Portugal, atu haruka nafatin ita nia ema hodi estuda tuir protokolu sira ne’ebé estabelese ona, atu kooperasaun ne’e di’ák liu tan,” Dehan Jenerál reformadu ne’e.

PR mos husu konabá Kooperasaun F-FDTL no PNTL iha fronteira terreste, maibé Filomeno resposta katak, bá futuru sei harii jestaun konjuntu konabá seguransa Fronteira.

“Ha’u informa, Ita nia PNTL de’it la to’o, tambá atividade ilegal númeru sa’e, entaun ami hanoin atu iha jestaun fronteira ida konjuntu, inklina PNTL, F-FDTL no Alfandega, atu nune’e bele koopera di’ák bá malu liu tan,” Dehan Fontes ne’e.

Antes ne’e, molok simu kna’ar PR bá períodu 2022-2027, Premiadu Nóbel bá Páz ne’e kontinua preokupa seguransa no defeza hafoin remata nia missaun Prezidensiál ba dala-uluk iha períodu 2007-2012.

(REMATA)