G-RTV.com (Dili): Prezensa sinza Saudozu Jornalista legendáriu Timor Leste (TL) Max Stahl, ne’ebé transporta husi Australia mai Timor Leste hamutuk ho família sei akontese iha loron 15 dezembru 2021.
Relasiona ho ida ne’e, Assosiaun Jornalista Timor Leste (AJTL) no Timor Leste Press Union (TLPU) nu’udár mahon bá jornalista sira Timor Leste, iha âmbitu prezensa sinza saudozu Max Stahl nian, rekomenda bá estadu ho pontu balun hanesan tuir mai ne’e.
‘’Atu rekorda saudozu no rekoñese saudozu nia esforsu sira, AJTL no TLPU rekomenda bá estadu Timor Leste atu garante nafatin liberdade imprensa no espressaun, promove no prezerva obra husi jornalista Max Stahl no fó apoiu kontinuamente bá CAMSTL inklui transforma CAMSTL bá Institutu Públiku no ikus liu atribui naran Max Stahl iha avenida ruma iha Timor Leste’’. Rekomendasaun ne’ebé lê sai husi portavóz AJTL no TLPU, Zezito da Silva ‘’ZEMACAR’’ iha konferénsia Imprensa ne’ebé hala’o iha resintu Centro Audovisual Max Sthal Timor Leste (CASMTL), tersa ne’e.
La’ós de’it rekomendasaun, maibé AJTL no TLPU husu bá jornalista sira atu bele konsentra iha aeroportu hodi simu sinza saudozu nian ne’ebé sei hahu ho parada militar.
‘’Ho sinza saudozu Max Stahl nian ne’ebé sei to’o iha Timor Leste, nune’e AJTL no TLPU konvida jornalista sira hotu, atu konsentra iha Aeroporto Internasionál Nicolao Lobato, hodi simu saudozu nia sinza nu’udár ita nia ónra bá ita nia grande jornalista ne’e’’. afirma porta vóz nu’udár moos atuál Sekretáriu Jerál TLPU iha konferénsia ne’e.
AJTL no TLPU konsidera saudozu nia dedikasaun iha mundu jornalízmu sai nu’udár ezemplu bá jornalista Timor-oan sira atu nafatin luta.
‘’Saudozu Max nia nia korázem no dedikasaun iha mundu jornalízmu, sai nu’udár ezemplu bo’ot tebes bá jornalista Timor-oan sira hodi nafatin luta dezumanidade iha ita nia rai, nune’e mak jornalista sira tenke kaer metin nafatin espíritu Max Stahl nian hodi luta bá direitu umanu iha Timor Leste’’. Haktuir iha konferénsia Imprensa ne’e.
Antes remata, assosiasaun rua ne’e husu bá média sira iha Timor atu konsentra bá notísia sira ne’ebé relasaun ho istória saudozu nian inklui serimónia tomak prezensa sinza nian hahu husi Aeroportu to’o loron ikus hodi halo’ot iha Santa Krúz.
Jornalista : Arménio.
Editór : G-RTV.com.
loading="lazy" />