Horta Hakarak Munisípiu 3 Sai Zona Ekonomia Integradu

Jornalísta : Arménio //

G-RTV.com (Lautém) : Kandidatu Prezidente Repúblika (PR)  2022-2027, José Ramos-Horta ne’ebé akompaña husi prezidente partidu CNRT, Kay Rala Xanana Gusmão hala’o kampaña nasionál iha munisípiu Lautém, Postu-Administrativu Lospalos-Villa.

Iha komísiu ho komunidade no simpatizante sira, Premiadu Nobel ba Páz afirma, munisípiu 3 iha parte leste iha poténsial tebes bele sai zona turístiku, sentru komersiál no dezenvolve agrikultura.

 ‘’Lautém, Baucau, Viqueque labele sai munisípiu separadu, tenke haree munisípiu ida integradu ekonómikamente, Lautém bele sai zona turístiku importante, dezenvolve didi’ak pekuária, lori Baucau sai sentru komersiál bo’ot no Viqueque dezenvolve agrikultura’’, dehan Horta ho númeru sorteiu 1iha kampu Futeból 745, Suku Fuiloro (Lospalos-villa), 10/04/2022.

Antes ne’e, RAEOA Oecusse sai zona espesiál, maibé eis-prezidente repúblika 2007-2012 ne’e hateten, presija hadia no balun kontinua.

‘’Ita kontinua dezenvolve RAEOA, iha buat balun ne’ebé presija hadia no balun ita bele kontinua, no balun taka, sira tenke hamutuk ho NTT (Indonézia), sai esportadór ba sira la’ós sosa de’it husi NTT, integra mós ho Austrália no ASEAN, ne’e mak Prezidente Repúblika, Parlamentu Nasionál no Guvernu tenke hamutuk hare assuntu ne’e,’’ Hateten Horta.

Kona-bá investór, iha apoiante rihun resin nia oin, Horta hatutan, tenke hare justisa tambá investor presija haree nasaun ne’e nia sistema judisiáriu.

‘’Ita tenke haree bá justisa, tambá komunidade internasionál la fiar ona ita nia sistema judisiáriu, la’ós fasil atu dada investor, presija investimentu internasionál hodi loke kampu servisu tambá atu dinamiza ekonomia la’ós estadu de’it,’’ Hatutan Nia.

Entretantu, partisipa iha kampaña refere, populasaun inklui militante partidu CNRT, partidu apoiante, simpatizante no movimentu ne’ebé ezíste mai husi postu-administrativu 5 konsentra no hakonu kampu futeból demokrasia.

Observa mós husi observadór nasionál no internasionál ne’ebé hala’o misaun observasaun iha munisípiu Lautém, assegura husi PNTL munisipál.

(REMATA).