Horta Sei Solusiona Krize Konstitusionál, Viqueque-Oan Promete Fó Apoiu

Jornalísta : Arménio //

G-RTV.com (Viqueque) : Premiadu Nóbel bá Páz, José Ramos-Horta nu’udár mós kandidatu Prezidente Repúblika 2022-2027, kontinua hala’o nia atividade kampaña eleitorál ba datolu iha munisípiu Viqueque villa, Sexta ne’e.

Iha komísiu kampaña polítiku, Ramos-Horta, hahu ho hato’o nia lamentasaun konabá violasaun konstituisaun ne’ebé komete husi atuál Prezidente Repúblika (PR).

‘’PR hahu halo krize violasaun konstituisaun bainhira la fó posse ba membru guvernu husi CNRT no KHUNTO, ne’e hanesan podér ne’ebé hadau kompeténsia Primeiru Ministru (PM), aumenta ho Taur nia guvernasaun ne’ebé lakon  OJE 2019, PM aprezenta karta rezignasau’’,Dehan Horta iha kampu futeból Beloi (Viqueque-Villa), 04/03/2022.

Nia hatutan tan, PR atuál kontinua halo diálogu ho partidu polítiku no líder nasionál sira, hodi labele hamosu eleisaun antesipada.

‘’PR konvoka enkontru ho ami, no deside dalan ida mak labele halo eleisaun antesipada, nune’e PR husu partidu sira atu halo kongressu hodi deside koligasaun bá guvernu foun, maibé derrepente hamosu guvernu ai-tonka ne’ebé la liu husi kongressu’’, Hatutan Horta.

Nune’e, atu solusiona krize konstituisaun ida ne’e, Eis-PR 2007-2012 deklara, sei halo diálogu nasionál ba líder partidu sira inklui FRETILIN no PLP.

‘’Hahu diálogu informál ho partidu no líder polítiku sira, kamarada sira iha FRETILIN inklui PLP, buat ne’ebé ita diskute mak oinsa haré violasaun konstituisaun, kontra regra funsionamentu parlamentu nasionál, hodi husu sira nia hakarak hafoin ha’u sei foti desijaun’’, Deklara Ramos Horta.

Iha fatin hanesan, Júlio Aparicio nu’udár reprzentante intelektuál Viqueque-oan husi partidu CNRT promete, sei fó vitória ba kandidatu PR no CNRT iha eleisaun ne’ebé sei mai.

‘’Ha’u hasoru maun bo’ot, ha’u promete bá maun bo’ot, eleisaun prezidensiál no parlamentár, Viqueque CNRT sei manan, nune’e, agora, di’ák liu vota ba númeru 14 sei lori ita ba moris di’ák’’, afirma Júlio.

Entretantu, Partisipante iha komísiu polítiku ne’e, mai husi komunidade, militante CNRT iha postu 5, movimentu afiliadu kuaze ema na’in 2000 resin no hetan akompañementu husi Prezidente CNRT, Kay Rala Xanana Gusmão, estrutura no kuadru partidu CNRT husi nasionál no munisípiu.

Kampaña ne’e, hetan mós observasaun husi CNE, STAE, no observadór internasionál, inklui hetan seguransa máxima husi PNTL.

Tuir planu, kandidatu husi CNRT ne’e sei kontinua nia kampaña polítku iha munisípiu Manatutu ho forma komísiu. (REMATA).