Horta Vizita AHDMTL, Gaspar : ‘’Ukun Ka La Ukun Tau Matan Nafatin Mai Ami”

Jornaslísta : Arménio  //

 G-RTV.com (Dili) : Nóbel ba Paz, José Ramos Horta akompaña hosi Koordenadora Fiar Iha Asaun Realidade (FIAR), Dulce de Jesus Soares, kontinua fó apoiu umanitaria ba família bo’ot Asosiasaun Halibur Difisiénsia Matan Timor-Leste (AHDMTL) iha Manleuana.

Iha vizita ne’e, lori apoiu umanitáriu ne’ebé prepara husi FIAR hanesan ropa ba feto no mane hamutuk unidade  no entrega mós hand sanitizer masa ki’ik 100 ne’ebé oferese hosi Kompañia Sales Luis Lda.

Premiádu Nóbel ba Páz, José Ramos Horta akompaña hosi Koordenadór FIAR entrega direita apoia hirak ne’e ba Diretór AHDMTL, Gaspar Soares ho membru sira iha edifisiu AHDMTL, iha suku Manleuana (Dili), 22/02/2022.

Kandidatu Prezidente Repúblika 2022-2027  hato’o agradesimentu ba domin bo’ot hosi ekipa FIAR ne’ebé sempre kari sira nia domin ba grupu no ema difisiénsia inklui labarik orfonatu no komunidade sira ne’ebé presiza ajuda.

‘’Agradese tebes bele hamutuk ho ekipa FIAR durante fulan kotuk too mai ohin kontinua halo asaun karidade hodi apoia ruma ruma no aproveita halo enkontru hodi rona  ita nia alin no oan sira hosi  Asosiasaun Halibur Difisiensia Matan Timor-Leste nia preokupasaun sira,” dehan Ramos Horta.

Iha oportunidade ne’e, Horta mós halo vizita hodi haree direita kondisaun uma ne’ebé família bo’ot AHMTL hela hodi aluga de’it, tambá sira seiduak iha edifísiu no uma permantente maske iha ona rai privadu iha Tibar (Likisa).

Durante vizita, Horta haruka kedas ekipa tekniku sei kompras materiál hanesan, kadeira meza, inklui sosa ventuña (kipas angin) hodi fasilita família AHDMTL bele utiliza hala’o sira nia prosesu aprendizajen.

Lideransa AHDMTL mós entrega kedas proposta ba Premiadu Nóbel ba Paz, Ramos Horta inklui Líder karrismátiku, Kay Rala Xanana Gusmão konabá tulun sira atu hetan doadór konabá konstrusaun uma iha rai-privadu Tibar.

Líder AHMDTL ne’e husu mos konkorrente Prezidente Repúblika 2022-2027 ho  númeru 14, maske la sai Prezidente Republika, husu atu apoiu nafatin.

‘’ Make la bá ukun ka ukun, ami husu atu bele ajuda nafatin ami, karik ba ukun husu atu fó hanoin bá guvernu atu iha seriedade atu tulun ema difisiénsia iha Timor Leste’’, mensájem husi líder AHMDTL.

Gaspar Soares mos hato’o agradese ba vizita supreza hosi Premiadu Nóbel ba Paz Ramos-Horta hodi rona preokupasaun difisiésia matan sira nian ne’ebé liga liu ho sira nia direitu atu assesu ba edukasaun, saúde no assesu ba fasilidade públiku ne’ebé hetan ladun hetan konsiderasaun husi guvernu.

Iha parte seluk, Reprezentante FIAR, Dulce de Jesus Martins afirma, apoiu ne’ebé sira oferese labele haree hosi nia valór, tanba sira ofereta ho domin hodi tulun família AHDMTL.

‘’Apoiu sira ne’e ita oferese tuir nesidade sira ne’ebé ita obserta katak, ita nia familia sira ne’e presiza hanesan ropa ba feto hamutuk unidade 70, ba mane 70 inklui apoiu mós hand santizer ne’ebé oferese hodi parseiru Kompañia Sales Luis Lda,” dehan Dulce.

Eis Ministra Edukasaun ne’e reforsa tan, foin lalais ne’e sira nia parte mós servisu mamutuk ho  Embaixada Xina iha Timor-Leste fahe mós muskiteiru ba komunidade iha área Postu Administraitu Na’in Feto-Dili kompostu Suku  Bemori komunidade sira hetan apoiu moskiteiru no roupa balun, tanba area ne’ebá risku ba moras dengue.

Nune’e mós, tuir dadus ne’ebé aprezenta husi Gaspar, ema ho difisiénsia iha territóriu nasionál hamtuk 38.118 kompostu hosi difiensia matan 14.828, difiensia tilun ka labele rona no labele ko’alia hamutuk 12.511, difiensia motora 7.466 no difisensia pisiko sosiál ka moras mental hamutuk 3.313. (REMATA)