Iha Covalima, Horta Kompremete Sei Dada Kadoras Mai Kosta Súl Tuir PEDN

Jornalísta : Arménio //

G-RTV.com (Covalima) : Kampaña Eleitorál kandidatu prezidente repúblika 2022-2027, José Ramos-Horta, iha munisípiu Covalima, kompremetidu sei hamutuk ho guvernu hodi hare didiák prioeridade iha tinan 5 oin mai.

Nu’udár futuru aman ba nasaun, Horta sei hamutuk ho guvernu aselara dezenvolvimentu iha tinan lima oin mai tuir Planu Estratéjiku dezenvolvimentu Nasionál 2011-2030 (PEDN) ne’ebé dezeña husi guvernu lideradu Kay Rala Xanana Gusmão.

‘’Dezenvolvimentu nasionál la’ós PR nia kompeténsia, maibé ema ho kakutak no koñesimentu internasionál, ha’u iha obrigasaun, atu hamutuk fo guvernu hare didiak prioridade nasionál tinan 5 mai ne’e tuir PEDN, hadia Estrada, agrikultura, bé mós, eletrisidade, no dada kadoras mai kosta súl’’, dehan Horta iha kampaña eleitorál ho tipu komísiu, iha Kampu futeból Ladi, munisípiu Covalima-villa, 08/03/2022.

‘’Prezidente tenke fó ideia ho guvernu, halo lobby internasionál atu dada ivestidór internasionál, no tenke dezenvolve iha parte fronteira tomak’’, Hatutan eis-prezidente repúblika 2007-2012 ne’e.

Premiadu Nóbel Bá Paz ne’e, esklarese liu tan, sei tulun guvernu hodi hamenus kiak tambá tuir nia númeru kiak sei-ás iha Timor, liu-liu iha RAEOA, nune’e iha kampaña ne’e nia fó sai katak sei hare didiák estratezia polítika RAEOA/ZEEMS.

Nune’e mós konabá problema arte marsiais no ritual, kandidatu ho númeru sorteiu 14 ne’e, konfirma, sei servisu hamutuk ho sira atu hametin dame.

‘’Ha’u sei servisu ho arte mariais, arte rituál, oinsá sira bele kontribui hametin dame iha Timor,’’ Konfirma Horta.

Iha kmapaña ne’e partisipa husi eleitór no simpatizante kuaze 2000 resin ne’ebé mai husi postu-administrativu ne’ebé eziste iha munisípiu Covalima, maske udan bo’ot maibé sira kontinua ho antusiázmu hodi rona deklarasaun polítika ne’ebé hato’o husi plítiku sira iha partidu CNRT inklui prezidente partidu Xanana Gusmão.

Entretantu, kampaña refere, superviziona husi CNE, PDHJ, OIPAS no observa husi observadór internasionál inklui mós PNTL ne’ebé halo seguransa máxima ba eventu polítiku ne’e. (REMATA)