Iha Ermera, LAT : ‘’Kafé La Folin Bainhira La Iha Estabilidade’’

Jornalísta : Júlio Sonia Paixão //

G-RTV.com (Ermera) : Kandidatu prezidente períodu 2022-2027, Lere Anan Timur (LAT) kontinua  halo kampaña ba dala-6 iha Munísipiu Ermera-villa ne’ebé simu husi lia-nain Ermera.

Iha kampaña ne’e Jenerál Reformadu ne’e, hatete katak wainhira nia mak manan iha elisaun prezidénsia 2022-2027 nia sei promove diálogu.

‘’Diálogu de’it mak sei bele kria estabilidade iha ita nia rai doben Timor, tambá bainhira imi nia kafé la folin,vanila la folin,maek la folin, se ita la iha estabilidade’’, Deklara LAT iha nia komísiu kampaña ne’ebé halao iha munisípiu Ermera, 07/03/2022.

Segundu Jerasaun FRETILIN ne’e afirma arrogánsia mak domina nune’e la iha diálogu nune’e ba future nia sei dudu jerasaun foun atu ukun.

Kadidatu ho númeru sorteiu 8 ne’e, hatutan liu tan, sei kontinua hare servisu guvernu nian konabá infrastutura.

‘’Ha’u mak sai prezidente, ha’u buka tuir saida de’it mak ministru sira halo, husu ba sira tambá sá mak eskola la iha, tamba sa mak estrada at, ne’e mak prezidente nia servisu la’ós prezidente mak tun ba jere, ida’’, Hatutan LAT.

Entertantu, iha eventu polítiku ida ne’e, partisipa husi simpatizente partidu balun inklui populasaun Ermera no hetan observasaun direita husi CNE inklui obsevadór  internasionál sira. (REMATA).