Investe iha turismu no loke merkadu tradisional iha Fronteira

G-News (Balibo) – Governu presiza investe turismu iha Postu Balibo no loke merkadu tradisionál nune’e evita transaksaun illegal iha liña fronteriza.

Prezidente Autoridade Munisípiu Bobonaro Ernesto de Oliveira hateten, Governu Sentral presiza investe ba Turismo iha Balibo, koñesidu ho tranjedia Balibo Five, ne’ebé Jornalista Internasionál naín-5 hetan tiru no sunu mutuk, iha loron 16 fulan Outubru tinan 1975, bainhira hala’o  filmazen no dokumenta invazaun Forsa Indonéziu sira nian iha Timor Leste, liuhosi fronteira rai maran [Balibo].

Hanesan fatin istóriku ba funu libertasaun nasionál, autoridade munisípal Bobonaro husu Governu sentral atu hadia infra-estrutura bázika, no investe setór turismu, hodi prezerva nafatin istória rezisténsia nian.

Prezidente autoridade garante katak iha ona ekipa tékniku atu dezenvolve jardim no dezenvolvimentu seluk, bainhira Governu insere planu orsamental ba tinan oin.

Alende ne’e, autoridade ne’e konsidera mós atu loke merkadu tradisional, nune’e bele evita transaksaun ilegal iha liña fronteira rai maran.

Maske autoridade seguransa iha ona kooperasaun ho autoridade seguransa Indonézia maibé defisil atu kobre hotu. “Kooperasaun ne’e it abele halo maibé ita labele resolve tamba fronteira luan teb-tebes, tamba ne’e atu resolve transaksaun illegal presiza loke merkadu tradisional para evita”, nia haktuir.

Maske durante ne’e autoridade seguransa prende produtu sira ne’ebé sidadaun sira lori hodi hakat liu iha liña fronteira ho illegal, maibé kontinua akontese tamba nesesidade família.

Iha fatin hanesan, Komadante Unidade Patrolãmentu Fronteira Superintendente Euclides Belo haktuir, transaksaun illegal ne’ebé akontese iha tinan 2021 sae makas kompara ho tinan 2022 ho númeru menus.

“totál transaksaun illegal ne’ebé ami prende iha tinan 2021 ne’e barak tebes, liu-liu grupu arte marsiais ne’ebé mak halo graduasaun ba nasaun sorin, ne’ebé fila mai ma kami kaptura barak teb-tebes, maibé iha tinan 2022 menus ona tamba kaptura ema naín-4 deit, signifika ita nia komunidade ne’e sivilizadu ona”, Superintendente Euclides Belo esplika.

Entertantu sidadaun sira ne’ebé kontra regras sira ne’ebé estabelese iha liña fronteira, liu-liu movimentu ho illegal, UPF sei aplika sansaun hanesan kanta Inú Nasionál Pátria-Pátria hanesan edukasaun Polísia nian ho konsiente katak, kontinua hametin nafatin sentidu Nasionálizmu.

Jornalista     : Amar Belo

Editór           : Amito Qonusere Araújo