G-NEWS (BOBONARO) – Prezidente Repúblika, José Ramos-Horta, Sábadu ne’e, delega assessór Sosiedade Sivíl no Apoiu Sosiál (SSAS), Quintiliano Moníz, lori fila hikas oan-kiak na’in tolu ba nia horik-fatin aldeia Mabelis, Suku Laber, Postu-Administrativu Bobonaro, Munisípiu Bobonaro.
Madalena Moníz ( tinan 14), Sejaltina Moníz (Tinan 8), Rofina Moníz (Tinan 5), sai oan-kiak tambá inan-aman mate iha tinan 2018 nune’e bin bo’ot Madelana foti kna’ar hanesan Inan-Aman ba nia alin na’in rua hodi sustenta sira nia moris basa la iha família ida ne’ebé bele suporta sira.
Bainhira ekipa SSAS-PR hamutuk ho autoriedade lokál identifika oan-kiak na’in tolu ne’e, hetan kedas atensaun husi Xefe Estadu Horta nune’e iha loron 06 Abríl 2023, ekipa SSAS lori oan-kiak na’in tolu ne’e ba iha Dili hodi hasoru malu ho Xefe Estadu Horta.
Iha Dili, oan-kiak feto na’in tolu ne’e, sempre hamutuk ho Xefe Estadu iha ne’ebé, Horta hakarak na’in tolu ne’e hela iha konventu ka hela ho Prezidente Repúblika hodi hare sira nia futuru liu-liu eskola, maibé infelizmente na’in tolu ne’e la aseita no hili dalan ba sira nia knua Mabelis.
Nune’e, Prezidente Repúblika, Horta delega hikas asesor Quintiliano hamutuk ho ekipa lori hikas oan-kiak na’in tolu ne’e ba sira nia knua.
‘’Prossesu hetan alin na’in tolu ne’e mai husi ekipa autoriedade lokál no staff SSAS hamutuk , no halo sira nia video, Prezidente Repúlika hare, sente triste tebes ho kondisaun moris sira na’in tolu, no haruka kedas ami atu bele lori na’in tolu ne’e ba Dili hodi buka meiu atu apoiu sira. Lolos ne’e Xefe Estadu mak hakarak lori mai rasik hodi hare kondisaun real sira na’in tolu nian maibé tambá okupadu nune’e kansela hodi delega ami mai,’’ Esplika assessor Quintiliano.
Asesór ne’e informa liu tan, uma ne’ebé dadaun ne’e sira hela ba, mai husi kontribuisaun komunidade iha sira nia bairro mak tau hamutuk forsa hodi harii uma ida ho medida 5×5.
‘’Prezidente Repúblika preokupa liu mak sira nia uma, maibé liu-liu mak futuru. Sira tenke eskola ne’e ak importante. Ne’e Prezidente Repúblika fó hela mensájem ba ha’u katak lori sira ba no koordena ho madre sira hodi ba hela no tenke eskola ne’ebé orsida sai husi ne’e ba halo koordenasaun ho madre sira iha Lolotoe,’’ Reforsa Quintiliano.
Xefe Estadu mos hakarak harii uma no loke keos ruma ba sira nain tolu hodi garante eskola, maibé Xefe Estadu kontinua preokupa sira nia estudu. Ne’e mak importante liu, dehan Quintiliano.
Bainhira to’o iha moris fatin, oan-kiak na’in tolu ne’e, simu ho autusiázmu husi komunidade sira ne’ebé durante ne’e tulun sira no hatene sira nia kondisaun moris.
Oportunidade ne’e, Xefe Suku Leber, Joanico da Silva, reprezenta komunidade hato’o ‘’ohin loron espesiál ida mai ami suku Leber, tambá hetan Prezidente Repúblika kuidadu ona labarik na’in tolu besik fulan ida iha Dili. Tambá inan-aman la iha. Durante ne’e hela fatin grave, la iha família ida tau matan. Ami agradese bo’ot ba Xefe Estadu Horta, ne’ebé halo mudansa ba labarik na’in tolu ne’e’’ Expressa autoriedade lokál .
Joanico mos, agradese ba ekipa tomak ne’ebé kolabora hodi lori oan-kiak na’in tolu ne’e to’o hetan atensaun husi Xefe Estadu Timor-Leste.
Além ida ne’e, tuir orientasaun husi Prezidente Repúblika, delegasaun lori mos apoiu nessesidade báziku ba komunidade vulnerável sira iha suku Leber hamutuk uma kain 60.
‘’Imi lori labarik na’in tolu ne’e ba nia fatin, lori mos apoiu nesesidade báziku ba família uma kain vulnerável,’’ Justifika Quintiliano.
Tuir lista, benefisiáriu hamutuk uma-kain 60 hodi benefisia ba apoiu husi Xefe Estadu hanesan fós saku ida, Mina litru 5 no supremi Kaixa ida.
‘’Ami halo toos mos arraska, udan la iha, apoiu ne’e ami fó agradese ba Prezidente Repúblika,’’ Agradese komunidade benefisiáriu, Regina Pereira Vicente.
Rekorda mos katak, Xefe Estadu atuál nia atensaun ba família vulnerável inklui labarik sira mai kedas husi mandate da-huluk 2007-2012 nu’udár Xefe Estadu, iha ne’ebé harii uma meia-parede inklui apoia nessesidade báziku no buka fundus ba labarik ki’ik sira ne’ebé presija atensaun.
Jornalista : Ekipa G-News
Editór Testu : Amito Qonusere Araújo
loading="lazy" />