G-NEWS (Dili) – Presidente Konsellu Imprensa Virgilio Guterres lamenta ho karta notifikasaun husi Komandu Jéral PNTL liuhosi Servisu Investigasaun Kriminal, ba xefe redasaun Jornal Independente Jorgino dos Santos no Jornalista Domingos Gomes iha loron 21 fulan Outobru tinan 2022.
Liuhosi konferénsia Imprensa iha salaun Konsellu Imprensa Qintal boot, Tersa-Feira ne’e (25/10/2022), Guterres protesta maka’as karta notifikasaun hosi komando PNTL ba jornalista na’in rua ne’e, tanba referénsia ne’ebé sai baze ba notifikasaun ne’e kodigo penal la’os lei Komunikasaun Sosiál no assunto ne’ebe sai foka ba notifikasaun ne’e konteudu jornalistiku ninian, tanba ne’e konsellu imprensa konsidera aktu ne’e hanesan tentativa atu kriminaliza produtu jornalistiku.
“ami hato’o protestu ne’e tanba desde 2014 mai to’o agora estadu iha ona lei espesífiku atu regula kona-ba lei komunikasaun sosiál, númeru 5/2014 tanba ne’e iha lei ne’e nia laran ko’alia kona-ba aplikasaun direitu da resposta no ratifikasaun, tuir Konsellu Imprensa ninia sosializasaun durante ne’e halo barak liu ba PNTL ho ofisiais sira, ami ko’alia katak asuntu sira ne’ebé relasiona ho konteudu jornalistiku ninian tenke rejolve ho utilizsaun direitu de resposta hodi hadia kontestu faktus sira ne’ebé mídia sira fó sai, tanba ne’e mak ami halo komperensia imprensa ne’e hakarak re-intera ami nia apelo ne’ebé fó sai ona komando Jéral PNTL atu retira notifiksaun ne’e”, Dehan Virgilio.
Entertanto CI kontinua husu ba Komando jéral PNTL karik iha konteudu notísia jornalístiku sira nian la tuir kode etíka jornalista, PNTL bele hato’o keixa ba Konsellu Imprensa, tanba konsellu imprensa hanesan entidade ida ne’ebé hari’i bazeia ba lei, atu tau matan ba konduta jornalístika no tau matan ba orgaun no meius komunikasaun sira.
Enkuantu bainhira PNTL hakarak halo notifiksaun ruma tenke bazeia ba lei komunikasaun sosial númeru 5/2014 la’os kodigu penal, tanba kodigu penal ne’e ba ema sira ne’ebé halo krime, tanba tuir Guterres katak, produtu jornalistiku la’os krime, no konsidera servisu ne’ebé atu hakonu direitu públiku ninian hodi hetan informasaun.
Jornalista : Alves Pinto
Editór : Amito Qonusere Araújo
loading="lazy" />