G-NEWS (DILI) – Komandu-Jerál PNTL tenke hadia sistema patrullamentu iha linha fronteira terrestre iha area Covalima, Bobonaro no Rejiaun Enklave Oecusse.
Sidadaun ida ne’ebé rezidente iha fronteira Batugade informa ba G-News via telefónika (Kuarta-Feira, 15032023) katak, Komandu-Jerál Polísia tenke hadia, sistema servisu ka patrullamentu iha linha fronteira, liu-liu halo rotasaun ba membru sira.
“Tuir Ha’u nia hanoin, kuandu iha Komandante-Jerál PNTL foun, entaun hadia uluk sistema patrullamentu iha fronteira. Diak liu halo rotasaun ba membru sira, tanba membru polísia UPF barak mak iha fronteira kleur liu ona”, hateten rezidente.
Nia dehan tán, ho rotasaun ne’ebé akontese, bele kombate problema illegal sira ne’ebé akontese iha linha fronteira.
“Kuandu membru sira ne’e kleur demais, ne’e ladun diak. Diak liu Komandante-Jerál Polísia foun, tenke hadia kedan, tanba ami iha fronteira ne’e hare’e, ema kestiona makaas, mas ita labele halo buat ida, tanba ita la iha poder”, haktuir Nia.
Joven ida, iha Munisípiu Covalima informa via telefónika mós katak, durante ne’e sira haree katak, autoridade Polísia Fronteira servisu diak, maibé hadia deit sira nia karater.
“Maun ita haree sira ne’e kasar liu. Dalaruma sidadaun Timoroan rasik halo negósiu illegal, ne’e sira kaptura, maibé sira sorin, entaun dalaruma sira husik deit. Ne’e mak ami observa durante ne’e. Maibé jerál ne’e diak hotu”, hakturi rezidente seluk tán.
To’o informasaun ne’e fó sai, G-News seidauk halo konfirmasaun ho Komandante UPF.
Jornalista : Ekipa G-News
Editór Testu : Amito Qonusere Araújo
loading="lazy" />