Lansamentu Kandidatura, Diskursu Assanami Nakonu Ho Mensájem Unidade

Jornalista : Arménio //

G-RTV.com (Dili) : Partidu Demkorátiku (PD), hala’o serimónia  lansamentu offisiál konaba Kandidatura Prezidente Repúblika períodu 2022-2027, Mariano Assanami Sabino ba povu tomak iha Tasi-Tolu, Munisípiu Dili.

Iha diskursu, Kandidatu ho númeru sorteiu 16 nia deklarasaun nakonu ho mensájem unidade tamba sei halo mundansa ba mentalidade no atitude polítika ne’ebé la kontribui bá unidade paíz nian.

‘’Ha’u mai atu halo mundasa ba mentalidade no atitude politika no sosiál sira ne’ebé la-kontribui ba unidade paiz nian. Ha’u hakarak kria ambiente polítika di’ak hodi Timor-oan tomak bele partisipa di’ak liu tan iha dezenvolvimentu ida integradu, sustentavel no inkluzivu’’, Deklara Assanami iha Diskursu lansamentu ne’ebé hala’o ha Tasi-Tolu, Dominggo ne’e, (20/02/2022).

Nia reforsa tan, Prezidente Republika (PR) nu’udár aman ba Nasaun no aman ba Povu, Nune’e, bainhira Assanami eleitu sei promove no hametin Timor Leste ida fraternu, solidáriu no unidu.

‘’Bainhira Eleitu, ha’u sei Promove no hametin liu tan Timor-Leste ida fraternu, solidariu, unidu, hodi atinji sosiedade ida justu,prosperu no inkluzivu, haburas atitude respeitu malu entre timor-oan sira, respeitu ba diferensia iha opiniaun politika, fiar no pratika kultural no tradisaun sira. Ho nune’e de’it mak ita bele dignifika timor-oan sira hotu nudar Povu, Nasaun, no Estadu’’, Reforsa atuál Prezidente Partidu PD ne’e.

Nia esplika liu tan, mudansa no transformasaun hahu husi agora, labele hein tan, Hein tan katak kontinua hanaruk ímpase polítika, hanaruk odiu no vingansa, hanaruk fila kotuk ba malun, hanaruk fahe malu, hanaruk moris iha susar no kiak, no halai do’ok liu tan husi Konstituisaun RDTL.

‘’Hamutuk, ho fuan no laran, vontade no domin ba ita nia rain doben Timor-Lest, Ita hamutuk, ita muda  polítika iha Timor; Timor ida ne’ebé hun ida, abut ida, Povu ida, Rai Timor ida de’it, Timor ida ne’ebé fraternu, solidáriu, unidu, justu, no prósperu liu tan. Timor ida ne’ebé respeita ho los no lolos Konstituisaun RDTL’’, dehan Atuál membru Parlamentu Nasionál ne’e.

Entretantu, PD iha eleisaun prezidensiál tinan 2007, 2012, 2017 oferese ona nia kandidatura hanesan Prezidente Saudozu Fernandu Lasama de Araujo (2007 no 2012), atuál Sekretáriu Jerál António Kalohan (2017), 2022 ho Prezidente PD atuál Assanami.

Nune’e mós, tuir observasaun iha terrenu, serimónia offisiál ne’e hetan partisipasaun máxima husi estrutura nasionál PD imutuk nklui kuadru no militante hamutuk 800 resin. (REMATA).