G-NEWS (DILI) – Tuir observasaun G-News iha kapitál Dili, Kinta-Feira (16032023) meúdia, liu-liu iha fatin públiku sira, hanesan Jardim Motael, tasi-ibun Kampung Alor, Jardim Fárol, no fatin seluk tan, foer ka lixu nakonu no soe arbiru, maske Governu prepara ona lixeiru atu soe foer.
Joven ida iha Jardim Motael Roberto Soares ba G-News dehan, lixu naklekar tanba sidadaun sira ne’ebé passa férias ho família, ka joven sira ne’ebé mai konversa, han no hemu, foer sira la tau iha lixu, maibé soe deit arbiru.
“Maun ne’e konsiensia ida-idak nian. Ami iha ne’e, kuandu hemu bee, ka han etu iha kaixa ki’ik, kuandu mamuk, ami ba tau iha lixu. Tanba ne’e depende ba ema ida-idak”, hateten nia.
Dalabarak, foer namkari, tanba ekipa raut foer tarde raut, sei difikulta foer balun namkari kuandu anin huu.
Iha tasi-ibun Kampung Alor, joven ida Luis do Rosario konfirma, ho lixu ne’ebé namkari, labele fo sala ba Governu, maibé konsiensia sidadaun mak la iha atu soe foer tuir ninia fatin ne’ebé prepara ona.
Nia fó sasin katak, maiória jovem sira ho grupu kuandu han ka hemu iha fatin públiku, lata mamuk sira la ba tau iha lixeiru ne’ebé prepara ona, maibé soe deit, tanba kondisaun lanu, no seluk tan.
“Tuir loloos, ita nia sidade Dili mos hela, maibé sidadaun sira mak gosta soe foer iha tur fatin, kuandu hamrik atu haseee hosi fatin ne’e. Ida ne’e kustume ne’ebé Ha’u mós hetan. Ha’u rasik la halo tan Ha’u komprende, ne’e konsiensia hosi Ha’u rasik”, nia aumenta.
Nune’e, sasin sira ne’e husu ba vizitante sira iha jardim públiku atu soe lata mamuk ka foer ruma, ba fatin ne’ebé prepara ona, tanba governu ninia responsábilidade mak prepara fatin, maibé vizitante la iha neon, sei fo impaktu ba sidade Dili, liu-liu fatin públiku kontinua nakonu ho foer ne’ebé namkari.
Bainhira iha tempu udan, foer kontinua nakonu iha estrada no jardim públiku sira.
Jornalista : Ekipa G-News
Editór Testu : Amito Qonusere Araújo
loading="lazy" />