Membru PSHT ho farda sunu bandeira KHUNTO no Os Verdes iha Hudilaran

G-NEWS (DILI) – Iha Kuarta-Feira (10052023), iha tuku 7 kalan, membru Organizasaun Arte Marsiais hosi Persaudaraan Setia Hati Terate (PSHT) ataka uma komunidade, no halo rahun barraka faan sasan produtu lokál, iha Bairro Hudi laran, aldeia Rai-Na’in Suku Bairro-Pite.

Alende ne’e, komunidade mós identifika, membru Persaudaraan Setia Hati Terate (PSHT), sira mós hatun bandeira tolu hanesan Congresso Nasionál Rekonstrusaun Timorense (CNRT), Kmanek Haburas Unidade Nasionál Timor Oan (KHUNTO) no Os Verdes iha uma leten, hatun no sunu kedan.

Reprejentante família Vítima Bobiana Soares informa ba Jornalista sira, Kinta-Feira (11052023) iha aldeia Rai-Na’in katak, membru sira hosi PSHT ho farda, ataka uma komunidade, inklui hatun bandeira tolu hanesan CNRT, KHUNTO no Os Verdes, no sunu.

” Sira hasai mak bandeira iha leten tolu, CNRT, KHUNTO, Os Verdes, mak sira sunu iha leten ne’ebá”, Bobiana informa.

Iha fatin hanesan, Xefe Aldeia Rai-Na’in hateten, asaun ne’ebé komete hosi membru Organizasaun PSHT ne’e hanesan asaun la diak.
“Asaun ne’e asaun la diak. Ne’e estrada públiku. Komunidade barak mak hela iha estrada ibun. Ohin dadersan Ha’u mai, komunidade aprezenta buat ne’e mai Ha’u, Ha’u hakfodak tanba problema ida hanesan ne’e”, Autoridade lokal ne’e lamenta tebes.

Nia aumenta tán, komunidade ezizi atu lideransa sira tenke hamate, tanba kuandu la hamate, situasaun ne’e sei grave tan ba oin.

” Tanba agora Komunidade barak mak triste, buat ida kios, buat ida uma, buat ida janela ne’e, odamatan ne’e benda mati, tanba sá mak tenke ba estraga ema nia sasan.

Hanesan autoridade Ha’u la simu, hahalok hanesan buka para atu hadia. Ema ne’ebé kriminozu hanesan ne’e la diak, ema sira ne’ebé hakarak estraga nasaun, estraga estabilidade iha Timor laran mak ne’e”, Xefe Aldeia lamenta tebes.

Tanba ne’e, Autoridade komunitáriu husu ba lideransa Organizasaun Arte Marsiais sira atu rezolve buat sira ne’e.

“Ami sempre enkontru ho KRAM hateten ona katak, situasaun iha Baze tenke hakmatek. Buat ida organizasaun iha nia fatin, labele hatais atributu Organizasaun nian iha komunidade nia le’et, labele lao iha estrada públiku, ne’e kontra lei”, Xefe Aldeia ko’alia lian makas.

Jornalista      : Ekipa G-News
Editór Testu  : Amito Qonusere Araújo