Mini-Kampaña Iha Soibada, Rogerio Lobato Akompaña Horta

Jornalísta : Amar Belo //

G-RTV.com (Manatutu) : Kandidatu Prezidente Repúblika 2022-2027, José Ramos-Horta hala’o Kampaña segunda ronda ho tipu mini-kampaña iha postu-administrativu Soibada, munisípiu Manatutu ne’ebé akompaña husi Rogerio Lobato.

Iha mini-kampaña ne’e , Rogerio Lobato koalia ‘’nostaligia’’ ho nia passadu hamutuk ho José Ramos-Horta (JRH) iha tempu eskola, iha missaun Soibada.

‘’Ami rua Horta sei ki’ik hamutuk iha Soibada, hare malu hanesan maun-alin to’o remata eskola kaurta klasse, ita rua sei la husik malu, ita hotu mak hahu prossesu ukun-án iha 1975, molok ita taka matan, tenke hadia hodi hato’o ho di’ák no prospero ba jerasaun foun,’’ Dehan Rogerio iha mini-kampaña, area missaun Soibada, Kinta ne’e, 07/04/2022.

‘’Ita presija líder mai koalia dame, koalia ho Timor-oan sira atu hamutuk, la’ós mai atu sobu ita nia unidade, ema ne’e mak JRH no Xanana, ami sira ne’e hamutuk harii FRETILIN no ASDT’’, Hatutan Fundadór FALINTIL ne’e.

Nia esklarese liu tan, labele haluha JHR tambá ne’e bainhira koalia tenke sukat hodi hatudu respeitu.

‘’Ami rekoñese líder sira hotu mak luta, maibé labele haluha JRH, tambá ne’e baihira koalia ho ita nia lider ruma, koalia ho respeitu, koalia ho haraik-án no sukat liafuan, tambá liafuan bele hakbesik no hafahe ita,’’ esklarese.

Iha primeira ronde, Rogerio Lobato mós nu’udár kandidatu ida iha kompetisaun sai prezidente repúblika maibé ikus mai la hetan apoiu máxima hodi avansa bá segundu volta.

Iha fatin hanesan, kandidatu Ramos-Horta kontinua habelar nia programa konabá hadia konstituisaun no hamutuk ho guvernu hodi diversifika ekonomia.

Iha mini-kampaña ne’e hetan observasaun direta husi observadór nasionál no internasionál inklui asegura husi PNTL no F-FDTL.

(REMATA).