G-RTV.Com (Dili) : Guvernu Liu husi Ministériu Turízmu, Komérsiu no Indústria (MTCI-Sigla Português) hamutuk ho Técnologia da Informação e Comunicação Institutu Públiku ( TIC Timor I.P) lansa website bá MTCI no assina Nota ba Intendimentu ho objetivu atu servisu hamutuk entre instituisaun rua refere.
Iha serimónia lansamentu ne’e, Ministru MTCI kongratula TIC Timor tambá bele rezolve kestaun efisénsia no efikáz iha servisu guvernasaun nian.
‘’Ita kongratula loron istóriku ida ne’e, liu husi guvernu konstitusionál da-8 tambá ita bele rezolve kestaun efisiénsia no efikaz iha servisu guvernasaun nian, orgulhu moos ba Timor-oan rasik (TIC) ne’ebé halo kontribuisaun bo’ot ba ida ne’e.’’. haktuir Ministru MTCI, Dr. José Lucas Do Carmo Da Silva iha diskursu serimónia lansamentu ne’ebé hala’o iha salaun MTCI, Faról, Segunda ne’e.
Nia akresenta liu tan, ho lansamentu no assina nota intendimentu hamutuk ne’e, hanesan indikadór ida katak Ministériu hakat ida ba oin tan.
‘’Lansamentu ba Website MTCI no Nota Intendimentu entre TIC ho MTCI ba kooperasaun ne’e, hanesan indikadór ida katak ministériu ne’e hakat ba oin tan, tambá hamutuk ho TIC oinsa atu aproveita fasilidade teknolojia ne’ebé eziste hodi tulun instituisaun ne’e’’ . dehan Nia.
Guvernante ne’e moos, esplika liu tan, ho asaun ne’e parte ida husi boa-guvernasaun nian ba desijaun sira bazeia ba evidénsia hodi fahe informasaun.
‘’Asaun ida ne’e, parte ida husi polítika boa-guvernasaun nian bá desijaun ruma bazeia ba evidénsia, no prontu atu partilha informasaun no simu sujestaun, hodi hadia liu tan kna’ar sira iha MTCI’’. Hateten guvernante ne’e.
Iha fatin hanesan, diretór ezekutivu TIC Timor, introdúz katak instituisaun públiku refere hala’o nia kna’ar tutela iha Gabinete Primeiru Ministru nia okos, hodi dezenvolve seitór kompetente ne’ebé TIC responsabiliza.
‘’TIC Timor hanesan ajénsia públiku ida iha Primeiru Ministru nia okos, ho nia objetivu prinsipál mak atu dezenvolve iha seitór informasaun, komunikasaun no teknolojia’’. Introdúz husi diretór Ezekutivu TIC Timor, Roberto Caitano de Sousa Vicente.
Hamutuk ho MTCI, TIC iha obrigasaun atu asegura polítika MTCI liu husi servisu informátika ne’ebé bele dezenvolve tuir nessesidade instituisaun nian.
‘’TIC iha obrigasaun tomak atu asegura polítika MTCI liu husi servisu informátika ne’ebé ami bele dezenvolve tuir nessesidade Ministériu nian nune’e ho servisu ne’ebé ami oferese ami fiar bele fasilita diak liu tan prestasaun servisu ba ita nia komunidade’’. Esklarese diretór ne’e.
Entertantu, nota intendimentu (MoU) ne’ebé assina hamutuk entre instituisaun rua, hakfahe ba parte tolu, mak hanesan, fornese no jere hosting website MTCI, dezeña, dezenvolve no asegura sistema KoBoToolbox liu husi kf.Kobo.apps.gov.tl hodi kria formuláriu elektróniku tuir nessesidade, no ikus liu fornese servisu E-mail offisiál MTCI ho domino MTCI.GOV.TL.
Iha serimónia refere, hetan partisipasaun husi vise –ministru MTCI na’in rua no Website refere sei administra husi Diresaun Nasionál Peskiza no Estatístika-MTCI.
Jornalista : Arménio.
loading="lazy" />