G-RTV.Com (DILI) : Deklarasaun Ministéiru Ensinu Superiór, Siénsia no Kultura (MESSK) iha kampuz Fakuldade Siénsia Sosiais-UNTL iha loron tersa ne’e, konabá reativasaun prossesu aprendizájem prezensiál iha Universidade sei hala’o iha fulan Augustu bainhira Estudante, Dosente no Funsionáriu sira iha universidade hotu simu ona vasina kompleta realsiona ho pandemia COVID-19, maibé antes ne’e, iha semana rua liubá, Universidade da Paz (UNPAZ) hala’o ona atividade prezensiál iha kampuz.
‘’Iha loron 27 no 28 Fulan kotuk, ami re-ativa prossesu aprendijazém prezensiál hodi halo evaluasaun ba estudante sira hodi hatene konabá progressu aprendijázem Online ne’ebé la’o durante fulan 6, husi avaluasaun progressu nian identifika katak partisipante estudante iha aula online maioria la tuir, nune’e ami deside hodi re-ativa’’ haktuir Reitór UNPAZ, Dr. Adolmando Amarál iha resintu Kampuz UNPAZ, Kuarta ne’e.
Adolmando afirma tan, UNPAZ iha planu hodi halo’o ezame dahuluk ba semester Impar tambá ne’e halo reativasaun, atu fasilita estudante balun ne’ebé la tuir aula online.
‘’Planu moos iha semana datolu fulan Jullu tinan ne’e, ami sei halo ezame ba semester 1, 3, 5 no 7 , nune’e iha semana rua nia laran ami tenke re-ativa atu estudante ne’ebé la prezensa iha eskola online sira aproveita bele assesu materia ruma’’. Dehan Nia.
UNPAZ moos re-ativa no haruka ona estudante sira ba hala’o estájiu sosiál no professionál iha instituisaun privadu no públiku iha Dili laran.
‘’Atividade seluk ne’ebé ami re-ativa mak estájiu sosiál ne’ebé involve estudante 1200 resin, no iha loron 6 fulan ida ne’e, estudante hamutuk 189 ba hala’o ona estájiu professionál iha instituisaun privadu no públiku’’. Reitór akresenta.
Konabá deklarasaun MESSK nian atu fó sansaun ba universidade ne’ebé dezobidénsia ba desijaun guvernu, ema númeru ida iha estrutura Universidade ne’e, deklara katak sei kolabora no pronto atu hatan.
‘’Ba sansaun husi MSSK, ami prontu kolabora no hatan, parte legál husi Universidade nian preparadu atu lori tuir dalan legál, karik iha xamada ruma ’’. deklara Adolmando.
Fontes ne’e, esplika liu tan, Guvernu deside ba sidadaun ne’ebé simu vasina kompleta, sei la’o livre sirkulasaun no atividade iha territóriu nasionál nune’e, fulan tolu ba kotuk to’o ohin loron dosente no funsionáiru hamutuk ho estudante balun kompleta ona vasinasau ba faze da-ruak.
‘’Fulan tolu ba kotuk, dosente no funsionáriu UNPAZ maioria simu ona vasina doze da-uluk, hafoin iha inísiu fulan Maiu, kontinua simu doze da-ruak, fulan kotuk moos ami kontinua hala’o vasinasaun ba estudante sira’’. Haktenik fontes ne’e.
Iha UNPAZ, ekipa kontrolu ba Dosente, funsionáriu no estudante sira, kuaze loron-loron haleu universidade atu kontrola ema hotu ne’ebé assesu mai universidade hodi hatudu kartaun vasinasaun.
‘’Ami nia ekipa kontrolu loron-loron haleu universidade hodi haree Dosente, funsionáriu no estudante ne’ebé hala’o atividade iha kampuz inklui sira ne’ebé hala’o estájiu tenke hatudu kartaun vasinasaun, até tuir aula moos dosente sira husu atu bele hatudu kartaun vasinasaun’’.esplika Reitór da-ruak hafoin saudozu Lucas Da Costa ‘’Rama-Metan’’.
Atualmente, totál estudante ne’ebé ativu iha UNPAZ hamutuk 9176, ho nia dosente no funsionáriu hamutuk ema na’in 411.
Jornalista : Arménio.
loading="lazy" />