NZ No OXFAM Entrega Uma Ba Vítima Inundasaun 2021, Xefe Suku Agradese Maromak

Jornalísta : Amar Belo //

G-RTV.com (Dili) : Guvernu Nova Zelandia apoia Oxfam Timor Leste Offisialmente Entrega Uma Ba Família Vítima Inundasaun Loron 4 Fulan Abril 2021, Antonio De Rosario Iha Aldeia Metin, Suco Lahane Orientál, Postu Administrativu Nain-Feto, Munisípiu Dili.

Tuir Oxfam Country Director, Fausto Belo Ximenes hateten uma ne’ebé entrega ba vítima inundasaun parte husi programa rekoperasaun ne’ebé  fundus husi guvernu nova-zelandia

”Uma ida ne’e ita harii parte husi programa responde ka rekoperasaun ba inundasaun sira ne’ebé ke fundus husi guvernu nova-zelandia liu husi embaixada no uma ne’e parte husi uma lima  ke ita sei harii ka rekonstrui husi inundasaun tinan kotuk, ida ne’e uma primeiru ita sei entrega fila-fali ba uma nain no uma ida ne’e ita halo ho modelu rezidente ba dezastre naturais sira nune’e mos mais resisivel ema ho difisiénsia no katuas sira ne’ebé hasoru difikuldade,” Informa Fausto Belo Ximenes ba jornalista sira iha segunda-feira ne’e, 04/07/2022.

Iha fatin hanesan, embaixadór Nova-Zelandia mai Timor Leste, Filip Hewit haktuir, povu timor leste hatudu ona forsa no rezilénsia bo’ot hodi rekopera inundasaun ne’ebé akontese iha tinan kotuk.

“Ha’u kontente los fila-fali mai iha fatin ne’e, tinan kotuk siklus estraga ema barak nia moris iha timor leste maibe povu timor leste hatudu ona forsa no rezilénsia bo’ot hodi rekopera husi inundasaun ne’ebé akontese iha tinan kotuk maibé ita presiza rekoñese katak susar tebes atu hadia situasaun ne’e no seidauk kompletu ba família barak maibé komunidade sira lakoi atu okupa de’it maibe hakarak harii di’ák liu no presiza tempu no aprende husi buat ne’ebé mamuk no hakarak preparadu di’ák liu tan ba futuru bele responde lalais diak liu tan wainhira mosu atu nune bele asegura família sira,” Dehan Filip Hewit Haktuir

Xefe Suku Lahane Trindade Do Amaral Pinto Batista, reforsa ho agradesimentu ba Maromak no natureza tamba sira mak fo kbi’it tomak ba ita no nia mak loke ita nia fuan hodi tulun malu

”Ha’u lamai atu agradese ba embaixador Nova-Zelandia, ha’u lamai atu agradese protesaun sivíl liu-liu ba iha guvernu no Oxfam maibé ha’u mai konvida ita hotu atu agradese ba Maromak tamba ho Maromak mak kbi’it tomak ba ita hotu no loke ita nia fuan hodi tulun malu hanesan timor-oan, hanesan sidadaun no hanesan kriatura. ” Agradese Xefe do suku Lahane Trindade Do Amaral Pinto Batista.

Entertantu, Konstrui uma ne’e Oxfam servisu hamutuk ho komunidade sira kuaze fulan tolu no medida uma 9X7, sala vizita ida, kuartu rua, kompletu haris fatin, dapur, no  totál orsamentu ba konstrusaun uma refere hamutuk dollar rihun hitu.

(REMATA).