G-RTV.Com (Baucau)- Konsellu Munisipál Kombatentes Libertasaun Nasionál –Munisípiu Baucau (CMCLN-MB, Sigla potuguês) ho inisiativa rasik husu guvernu liu husi ministériu saúde (MS) atu entrega ospitál tuan ne’ebé lokaliza iha Suku Kaibada Postu Baucau Villa, Munisípiu Baucau, ne’ebé koñesidu ho naran Ospitál Riamare bá Veteranu sira hodi utilija sai ospitál veteranu iha futuru.
‘’Inisiativa ne’e mai husi ami veteranu sira, hasoru direta ho MS hodi entrega ospitál antigu ne’e bá veteranu hodi utilija bá klínika atu nune’e bele organiza ona doutór espesialista sira hodi tau matan bá veteranu sira tambá atendimentu bá problema saúde veteranu nian la espesífiku iha rai-laran’’ haktuir Sekretáriu CMCLN-MB, Manuel da Costa Soares ‘’ALARI’’ foin lalais ne’e iha Baucau.
Husi inisiativa ida ne’e, hetan resposta pozetivu husi guvernu liu husi MS no possibilidade sei entrega offisialmente husi atuál Ministra Saúde (MS) dra. Odete Maria Freitas Belo bá Ministériu Assuntu Veteranu no Kombatentes Libertasaun Nasionál (MVKLN), liu husi Sekretáriu Estadu Assuntu Kombatentes Libertasaun Nasionál iha semana ne’e.
‘’MS deside ona, atu entrega ospitál antigu Riamare bá Veteranu sira no sei offisializa iha loron 27 fulan ida ne’e husi MS no MVKLN hafoin remata serimónia reflesaun konabá memória Saudozu DAITULA iha aldeia Wani-uma, Suku Kaibada’’ . hateten veteranu ho nia naran kódigu ALARI.
Dadaun ne’e, hafoin ukun-án durante tinan 20, tuir observasaun husi G-RTV.com, Timor Leste seidauk iha klínika espesiál ida bá ema luta na’in sira (veteranu) maibé guvernu liu husi MS haruka de’it veteranu sira bá iha rai-liur atu halo tratamentu saúde bainhira iha ona kondisaun grave.
Jornalista : Arménio.
Editór : Ekipa G-RTV.
loading="lazy" />