G-RTV.Com (Dili) : Partidu Os Verdes de Timor hanesan partidu ne’ebé foin hahu iha tinan 2020, iha kandidatu rasik ne’ebé mai husi prezidente partidu atu kompete iha eleisaun prezidensiál 2022 tuir konstituisaun haruka.
‘’Iha estadu direitu demokrátiku, ema hotu inklui reprezenta partidu, iha direitu atu kandidata-an bá PR tuir konstituisaun haruka, nune’e internalmente patidu Os Verdes sura husi inisadór no estrutura komité sentrál, deside ona Prezidente Partidu atu anunsia nia kandidatura ba públiku hodi kompete iha eleisaun Prezidensiál 2022’’. Hateten Sekretáriu nasionál Partidu Os Verdes, Carlos Martins iha kuarta ne’e.
Nia hatutan tan, Os Verdes de Timor deside atu iha kandidatu rasik tambá atu reprezenta fígura jerasaun foinsa’e iha palku polítika nu’udár kandidatu prezidente.
‘’Ami garante tambá hare husi eleisaun dala-4 PR nian, partidu OS Verdes de Timor halo ona observasaun ida, no deside hakat ba oin hodi reprezenta fígura jerasaun foinsa’e iha palku polítika nian nu’udár kandidatu PR ’’. subliña Carlos bá G-RTV.Com.
Partidu ne’ebé atualmente lidera husi Eng. António Lela Hunu Cruz, sei la depende bá fígura líder istóriku sira, tambá Os Verdes de Timor konfia-an hanesan jerasaun foun.
‘’ Os Verdes nia ezisténsia atu halo harmonizasaun polítika hodi konsidera fígura polítiku sira seluk, maibé la iha nessesidade atu hetan bensaun ( apoiu) husi lideránsa istóriku sira tambá Os Verdes de Timor Konfia nia-an hanesan jerasaun foun.’’. Dehan Carlos.
Oras ne’e dadaun, partidu Os Verdes hala’o preparasaun atu re-rezistrasaun iha Tribunál Rekursu hodi hetan legalizasaun nu’udár partidu ida iha Timor Leste hafoin Tribunál fo notifikasaun konabá atu prossesa inskrisaun nian ho razaun atu hadia no kompleta rekézitus balun tui lei partidus polítiku nian iha artigu 13.
Tuir informasaun ne’ebé G-RTV.com assesu, iha ona preparasaun ba finaliza rezistu nian kuaze % 60 no iha fulan rua tan bele kompleta atu rezista hanesan partidu ida iha Timor Leste.
Jornalista : Arménio.
loading="lazy" />