PD ‘’La Fihir’’, PUDD Simu Martinho Gusmão Ba Kandidatu PR 2022-2027

Jornalista : Arménio //

G-RTV.Com (Dili) : Partidu Unidade Dezenvolvimentu Demokrátiku (PUDD) liu husi konferénsia nasionál hodi hili kandidatu preferénsia na’in rua atu reprezenta PUDD konkorre ba Eleisaun Prezidensiál 2022.

Iha konferénsia ne’e, konferesista sira kuaze ema na’in 250 resin ne’ebé mai husi munisípiu no estrutura nasionál hili Eis-Padre Martinho Gusmão ho votu 220 hodi halakon atuál xefe bankada PUDD iha Parlamentu Nasionál, António Benevides atu kandidata-án ba Prezidente Repúblika (PR) 2022-2027.

‘’Ohin PUDD nia konferénsia ne’e, atu hili reprezentante PUDD hodi fo apoiu ba eleisaun, nune’e solusaun ida, liu husi konferesista sira, hili Eis-Padre Martinho Gusmão’’. Dehan Silvestre Sufa nu’udár Prezidente Interinu PUDD iha Hudi Laran, Kinta ne’e (03/02/2022).

Konabá kontratu polítiku ho kandidatu inkluzaun husi PUDD ne’e, Prezidente Interinu afirma, importante mak hare povu tomak no bele servisu hamutuk ho PUDD iha kualkér tempu.

Ekipa sussesu, PUDD mak sei organiza hotu husi porssesu tomak husi nível nasionál to’o baze, no tuir planu sei aprezenta bá Tribunál entre ohin no loron ikus aban, teni Nia.

Antes ne’e, Partidu Demokrátiku (PD), iha tinan rohan 2021, liu husi konferénsia Konsellu Polítiku Nasionál (CPN-Sigla Português), hili kandidatu PR ne’ebé sei reprezenta partidu atu kompete iha eleisaun 19/03/2022 ne’e mak António da Conçeicão ( atuál Sekretáriu Jerál PD), Costâncio Pinto (Fundadór PD), Martinho Gusmão (fundadór PD), Adriano do Nascimento (Prezidente CPN), maibé PD  ‘’La Fihir’’ kandidatu na’in 4 seluk hodi avansa ba konvensaun nasionál.

Iha konvensaun nasionál, lori de’it kandidatu interna na’in rua, Mariano Assanami Sabino no Adriano do Nascimento, finalmente liu husi votu aklamasaun, hili Prezidente Partidu Assanami avansa hodi lori PD atu konkorre iha eleisaun Prezidensiál ne’e.

Remata