G-RTV.com (Dili) : Hafoin Prezidente Repúblika Franscisco Guterres Lú-Olo dekreta Data Eleisaun Prezidensiál 2022-2027 (ELPREZ) iha semana kotuk, mosu ona kandidatu ne’ebé sei kompete iha festa demokrasia refere.
Tuir Diretór Nasionál Servisu Notariadu, Crisogno da Costa Neto, esklarese, to’o semana da-ruak iha ona kandidatu na’in 9 ne’ebé halo ona auténtiku ka konfirma dokumentu komprovativu molok aprezenta iha rezistrasaun kandidatu iha Tribunál Rekursu.
‘’Semana Kotuk, iha na’in 8, ohin segunda-feira iha maliana, aumenta ida mak kandidatu Anacleto Bento Fereira husi partidu PDRT’’. Esklarese diretór notariadu ne’e, via-Telefone bá G-RTV.com, loron 24/01/2022.
Konfirma ho Partido Democrático Da República De Timor (PDRT) konabá kandidatura husi partidu refere, Sekretáriu Jerál, Nicolao Borremeo, deklara ‘’Sim, kandidatu ne’e mai husi PDRT, ami garante nia rezistrasaun iha tribunál no kompete iha ELPREZ, semana ne’e ami sei deklara públikamente’’. Afirma Nia.
Kandidatu PrezidenteAnacleto, mai husi munisípiu Ermera, Postu-Administrativu Atsabe ho nia esperénsia hanesan ema akadémiku no diplomata hamutuk ho diplomata senior Timor-oan iha kontinente Europa, iha tempu okupasaun indonézia.
Entretantu, tuir lista ne’ebé G-RTV.com assesu iha Notariadu Nasionál-Ministériu Justisa, kandidatu ne’ebé konfirma ona sira nia auténtika ba kartaun eleitorál apoiante nian tuir lei eleitorál ba ELPREZ artigu 17, númeru 3 no 4 mak hanesan :
- Isabel Fereira (Kandidata Independente).
- Milena Pires (Kandidata Independente).
- Armanda Berta (Kandidatu Partidu KHUNTO).
- Tenente Jenerál Lere Anan Timur ( Kandidatu Independente).
- Felisberto (Kandidatu Independente).
- Antero Bendito (Kandidatu Independente).
- Franscisco Guterres Lú-Olo ( Kandidatu Partidu FRETILIN).
- Costâncio Pinto (Kandidatu Independente).
- Anacleto Bento Fereira (Kandidatu Partidu PDRT).
Jornalista : Arménio.
Editór : Ekipa G-RTV.com
loading="lazy" />