G-RTV.Com (DILI): Relasiona ho eleisaun Prezidente Repúblika (PR) ne’ebé sei akontese iha tinan 2022, PARTIDO DEMOCRÁTICO REPÚBLICA DE TIMOR (PDRT) hahu ona iha faze diskusaun hodi avansa ba kompete iha Eleisaun Prezidente Repúblika períodu 2022-2027.
‘’PDRT hanesan partidu polítiku ida iha Timor, iha ona esperansa no vizaun atu iha kandidatura rasik ba Prezidente Repúblika Timor Leste iha períodu 2022-2027 maibé sei iha faze diskusaun liu husi komité sentrál PDRT atu hamosu desizaun kolektivu ida’’. Deklara Matias Borromeu hanesan Sekretáriu Jerál (SEKJE) PDRT iha salaun Lalini, Komisaun Nasionál Eleisaun (CNE-Sigla Portugês), Kinta ne’e (1/07).
Nia reforsa tan, partidu PDRT iha ona planu no possibilidade atu haree kandidatura seluk ne’ebé la’ós mai husi partidu rasik karik PDRT la promove nia kandidatura.
‘’Iha moos planu no possibilidade atu haree kandidatura potensiál balun hodi apoia, karik PDRT la promove nia kandidatura rasik’’. fontes ne’e reforsa.
SEKJE klarifika moos, PDRT fihir ona kandidatu balun no iha ona faze diskusaun tambá partidu ne’e rasik iha opsaun rua atu hili.
‘’Oras ne’e dadaun, PDRT fihir ona kandidatu balun, no la’o ona iha faze diskusaun, tambá opsaun rua nebe’e diskute, entre iha kandidatura rasik husi partidu ou bele moos apoiu kadidatu seluk tuir saida mak partidu fihir no deside’’. Haktuir Matias.
PDRT eziste iha 2004, hetan legalidade husi Tribunál Rekursu no rezistu iha ajenda Organizasaun mundiál ONU iha 2005. Partidu ne’e konkore iha Eleisaun jerál hahu 2007 to’o 2017 maibé la liu barreira.
Iha Eleisaun antesipada 2018, PDRT hala’o koligasaun iha Bloku Unidade Popular (BUP) ne’ebé lideradu husi Matebian Cecílio Caminha no iha 2020 hala’o re-estruturasaun husi nasionál to’o baze hodi hametin esperansa atu konkore mesak hanesan partidu ida ba eleisaun jerál 2022-2023.
Jornalista : Arménio.
loading="lazy" />