G-NEWS (Dili) – Porta Voz Komando Jerál PNTL Superintendente Xefe Arnaldo de Araújo klarifika, karta notifikasaun hosi Servisu Investigasaun Kriminal Nasionál (PNSIK-PNTL) ne’ebé haruka ba xefe redasaun Jornal Indepedente Jorgino dos Santos no Jornalista Domingos Gomes iha loron 21 fulan Outobru tinan 2022, laos atu kriminaliza Jornalista sira.
Liu husi komferensia imprensa ne’ebé hala’o iha Edifisiu Komando Jéral PNTL, Kaikoli Dili Kuarta Feira ne’e (26/10/2022), Superintendente Xefe Arnaldo de Araújo esplika, karta notifikasaun ne’ebé fó ba Jornal Independente la’os kriminaliza maibé bolu hodi fó informasaun atu fortifika kle’an kona-ba informasaun ne’ebé Jornalista Independente hakerek iha jornal.
“Informasaun ne’ebé espalha iha mídia liu-liu kona-ba notifikasaun ba Jornalista Independente tanba horseik komandante jéral bolu ona jornalista independente no ha’u akompaña iha laran katak notifikasaun ne’e hanesan baibain atu mai fó de’it klarifikasaun para hodi hatene lolos, la’os atu kriminaliza fali jornalista ne’e la’e, maibe fortifika de’it informasaun kle’an”. Dehan porta voz
Karta notifikasaun ne’ebé sai tanba momentu ne’ebá, Komandante Jéral PNTL Komisáriu Polísia Faustino da Costa iha rai liur, ne’ebé substitui hosi Segundu komandante Jerál PNTL hanesan Komandante Jéral mak ko’alia, nune’e bolu Jornalista no Xefe Redasaun atu halo klarifikasaun, no fortifika de’it produtu Jornalista ne’ebé hakerek iha titúlo notísia.
Porta Voz Komando Jéral PNTL mós seidauk bele esplika klaru bainhira mak atu dada hikas karta notifikasaun PNTL nian hasoru Jornalista, tanba ne’e husu ba jornalista sira atu fortifika informasaun tuir notísia ne’ebé hakerek.
Antes ne’e, Asosisaun Jornalista sira, Konsellu Imprensa no autoridade komunidade sira seluk kontra makas karta notifikasaun hosi Komandu Jerál PNTL hasoru Jornalista no Xefe Redasaun Jornál INDEPENDENTE, no konsidera PNTL hamate Liberdade Imprensa iha Timor Leste.
Jornalista : Alves Pinto
Editór : Amito Qonusere Araújo
loading="lazy" />