PNTL la Tolera bus tula Passageiru liu kapasidade iha loron Finadu

G-News (Dili) – Polisia Nasionál Timor-Leste sei halo atuasaun ba Bus sira ne’ebé tula pasageiro liu kapasidade iha loron finadu.

Kontrolu Polísia ne’e atu evita desatre no asidente ne’ebé la espera atu akontese.

Kuarta feira  (26/10/2022) iha edefisiu Komando Jéral Kaikoli Dili, Porta Voz PNTL Superintendente Xefe Arnaldo de Araujo  hateten, dadauk ne’e Komunidade barak  mak hala’o ona viagem ba  idak-idak nia munisipiu hodi selebra loron Finadu, tanba  ne’e PNTL sei fó atensaun ba motorista sira atu la’o ho kuidadu-an, liu-liu husu ba kondutor Bus sira, atu tula pasajeiru tenke tuir kapasidade kareta nian.

Polísia husu atu labele tula pasajeiru sira liu kapasidade kareta, bainhira Polísia identifika, sei aplika sansaun

“Komandu PNTL husu ba motorista sira liu-liu Bus atu labele tula liu husi kapasidade, karik liu komandu sei fó atensaun ba sira no la rona nafatin tenke fó sansaun multa tuir asaun sira ne’ebe sira komete, liu-liu iha regras tranzito nian”, Dehan Superintendente Xefe Arnaldo

Polísia mós bandu atu pasajeiru sira tur iha kareta leten no tabele, tanba perigu ba vida.

Komandu Jéral PNTL mós sei fó orientsaun ba komandante PNTL  iha munisipiu sira hotu atu bele fó seguransa ba komunidade hodi bele selebra loron Finadu iha idak-idak nia munisipiu ho di’ak.

Aliened ne’e, autoridade seguransa husu mós ba sidadaun sira liu-liu Joventude atu labele hemu tua arbiru, ne’ebé afeta ba estabilidade.

Entertantu Komando Jeral PNTL mós husu ba Funsionariu sira atu labele utiliza kareta estadu iha tempu feriadu, tanba PNTL sei halo atuasaun tanba Governu hasai ona dekretu kona-ba utilizasaun transporte estadu nian.

Jornalista   : Alves Pinto

Editór           : Amito Qonusere Araújo