G-NEWS (DILI) – Ikus-ikus ne’e iha fatin públiku, iha kapitál Dili, lixu ka foer naklekar, tanba sidadaun sira la iha konsiênsia atu soe lixu iha ninia fatin.
Koordenador Nasionál Rede ba Rai Hortencio Pedro F. Do C. Vieira informa ba G-News, Tersa-Feira(11042023) katak, sidade Dili nu’udar kapitalál ba nasaun, no tanba populasaun barak entaun produs lixu mós barak no namkari iha fatin-fatin inklui tasi ibun.
“Primeiru llixu sira ne’e balun mai husi área as sira ne’ebé ema soe arbiru ba mota laran depois mota lori mai iha tasi ibun no tasi laran”, tenik Nia.
Tuir Hortelêncio katak, sidadaun barak mós seidauk sensível ba lixu no presija hasae konhesimentu kona-ba problema lixu iha nível publiku, liu husi kampanha sosiál sira hodi hamosu konsiênsia.
“Ida seluk presija iha ona lei ne’ebé rigorozu hodi regula ema nia hahalok hodi labele soe lixu arbiru no tenke iha sansaun ne’ebé todan”, Hortêncio re-afirma tán.
“Governu presiza halo intervensaun no presiza iha task force ida ne’ebé sistemátiku no fokus no dada partisipasaun públiku hodi tau matan hamutuk ba situasaun lixu iha tasi ibun no bairu sira”, Koordenádor Nasionál Rede ba Rai ne’e esplika liutan.
Ho problema sira ne’e, Hortêncio husu mós ba kampanha nasionál hodi kombate lixu no dada partisipasaun públiku, liu-liu Autoridade nível komunitáriu, eskola sira, movimentu juventude sira, relijioju, Ministériu sira, funsionáriu públiku, Polísia, Militár, Joven arte (seniman) sira, no Grupu vendedor sira ne’ebé namkari iha tasi ibun no iha merkadu sira.
Antes ne’e, ekipa saneamentu Munisípiu Dili deklara ona katak, Governu la iha osan atu raut foer iha lixeiru públiku.
Bainhira iha tenpu udan monu rai, sidade Dili ne’ebé mós no saudável, nakfilak sai kampu lixeiru, nobele hakiak susuk, ikus mai hamosu denge ba sidadaun sira, liu-liu labarik ki’ik oan sira.
Jornalista : Ekipa G-News
Editór Testu : Amito Qonusere Araújo
loading="lazy" />