G-NEWS (DILI) – Aliansa Nasionál Luta Kontra Krime Infantesidu (ANCI-TL) rekomenda ba Partidu Polítika sira atu asegura, no proteze labarik sira iha risku durante kampanha eleitóral no eleisaun parlamentár tinan 2023.
Diretóra Jerál Aliansa Nasionál Luta Kontra Krime Infantesidu Marciana Pereira, ba Jornalista sira hateten, Partidu Polítiku sira iha obrigasaun atu prevene envolvimentu labarik sira iha tenpu kampanha no eleisaun parlamentár.
Tuir Nia, materia kampanha eleitóral ka mensajen ba públiku tenke uza lia-fuan edukativu ba labarik no juventude sira.
“Ko’alia kona-ba programa ne’ebé diak no mós kona-ba labarik sira nia futuru. Husu atu labele ko’alia lia-fuan ne’ebé bele hamosu problema no fó impaktu ba labarik sira”, Diretór ne’e esplika liu-tan.
Alende ne’e, Aliansa Nasionál Luta Kontra Krime Infantesidu mós husu ba autoridade seguransa atu fó kontrolu másimu ba movimentu transporte públiku hodi evita asidente trâfiku.
“Polísia no Forsa seguransa partidu nian tenke toma atensaun makaas ba oráriu, rute no fatin kampanha atu nune’e bele evita konfrotasaun. Polísia tenke halo kontrolu másimu ba transporte hotu ne’ebé Partidu Polítiku sira uza hodi halo mobilizasaun massa atu evita lori kro’at, alko, no moos evita dezastre”, Nia aumenta.
” Husu mós ba inan-aman no komunidade sira atu evita lori labarik sira iha tenpu kampanha no eleisaun parlamentár, hadook an hosi aktus violênsia, no prevene labarik sira partisipa atividade negósiu iha fatin kampanha”.
Diretór Aliansa Nasionál Luta Kontra Krime Infantesidu Marciana Pereira mós husu ba edukadór sira atu labele fó lisensa ba estudante sira atu partisipa kampanha eleitóral durante órariu prosesu aprendijajen lao.
Entertantu, Aliansa Nasionál ne’e mós husu ba Instituisaun Religiozu sira atu hato’o ba sarani sira liuhosi ómilia iha tenpu misa atu labele envolve labarik sira iha kampanha eleitóral.
Jornalista : Ekipa G-News
Editór Testu : Amito Qonusere Araújo
loading="lazy" />