Ronde Ikus Iha Eleisaun, Lori Florentina Smith Lidera OPMT

Jornalista : Arménio //

G-RTV.com (Dili) : Konferénsia Nasionál Organizasaun Populár Timorense (OPMT) husi partidu FRETILIN ba dala IV ne’ebé hala’o durante loron 3, ikus mai lori Florentina Da Conçeicão Smith lidera OPMT bá períodu 2022-2027.

Eleisaun iha konferénsia ne’e kompete husi ema na’in tolu no avansa ba segunda ronde ho ema na’in rua.

‘’IV Konferénsia nasionál OPMT nian, hala’o eleisaun ba órgaun nasionál ba mandatu 2022-2027, konkorrente dauluk refere ba órgaun unipessoál nu’udár sekretáriu jerál ne’ebé kompete husi Florentina Da Conçeicão Smith, Guilermina Ribeiro, no Aurora Ximenes. Eleisaun refere hala’o ho sekreta’’. Dehan husi komunikadu imprensa ne’ebé G-RTV.com assesu iha loron 14/02/2022.

Entre kandidatu na’in tolu ne’e, la iha ida mak hetan votu maioria  (50+1) iha ronde da-uluk nian, nune’e tuir rezimentu avansa bá ronde Dá-Ruak (ronde ikus), ne’ebé kompete de’it ona ho kandidata na’in rua, Florentina Da Conçeicão Smith no Guilermina Ribeiro.

‘’Iha segunda ronde da-ruak, konferesista maioria ba kandidata Florentina Da Conçeicão Smith hodi sai nu’udár sekretáriu jerál OPMT eleita ba períodu 2022-2027’’. Subliña iha komunikadu ne’e.

Biar lakon iha eleisaun, kandidata nain rua ne’ebé kompete, Sekretária Jerál eleita  hatama kedas naran ba segundu órgaun nasionál ne’ebé hanaran Konsellu Koordenadór Nasionál (KKN).

Sekretáriu Jerál OPMT tuir estate esplika katak iha responsabilidade hodi tau matan ba vida instituisionál OPMT ba tinan lima tuir mai.

Konferénsia ne’e, hala’o iha salaun Katedrál Dili hahu iha loron 11-13 fulan Fevereiru 2022 ho konferesista kuaze ema na’in 400 resin ne’ebé mai husi delegada municipal inklui RAEOA iha territóriu nasionál.

OPMT nu’udár organizasaun Feto partidu FRETLIN ne’ebé partidu istóriku ne’e harii iha tinan 1975 hodi kontribui ba libertasaun pátria bainhira funu komesa tama. (REMATA).