G-RTV.com (Dili): Grupu Comunnity CS15 ne’ebé mai husi estudante departamentu komunikasaun sosiál (CS) ano letivu 2015, fakuldade Siénsia sosiais, Universidade Nasionál Timor Lorosa’e (UNTL) , sai manan na’in da-ruak Iha kompetisaun ‘’Content Creator Youtube 2021” ne’ebé organiza husi Sekretáriu Estadu Komunikasaun Sosiál (SEKOMS).
Dirijente grupu CS15, Bourdalónia Benevides hateten katak, ho amizade iha universidade liu husi ano letivu 2015 nian, lori ami atu tuir kompetisaun refere.
‘’Ho amizade iha CS ano letivu 2015, reprezenta ami na’in 8, iha inisiativa tuir saida mak ami aprende iha universidade atu bele partisipa hanesan kontestante ida iha kompetisaun ‘’Content Creator’ Youtube” ne’ebé hetan moos suporta máximu husi dosente departamentu nian’’. Hateten Bourdalónia iha serimónia enserramentu kompetisaun, Palasiu Guvernu, Sexta ne’e (30/07).
Husi inisiativa ne’ebé grupu CS15 Iha, sira partisipa iha kompetisaun refere liu husi vídeo badak ho nia títulu ‘’Bye Hoax, Let’s Get Vaccinated’’ (https://www.youtube.com/watch?v=lfE9SUU9MLk) , objetivu atu kampaña kombate lia-falsu (HOAX) no Vasina Covid-19.
‘’Inisiativa ne’ebé iha, lori ami partisipa iha kompetisaun refere liu husi vídeo badak, nia títulu ‘’Bye Hoax, Let’s Get Vaccinated’’ ho nia objetivu atu kampaña konabá kombate lia-falsu (HOAX) ne’ebé espalla lalais liu no Vasina Covid-19 nune’e bele ajuda komunidade no ema hotu hodi kontribui atu fo sai informasaun no fiar informasaun eh notísia sira husi fontes kredível no foo korájem bá ema hotu atu vasina kontra Covid-19’’. Esplika feto foinsa’e husi Postu administrasaun Maubisse (Ainaru) ne’e.
Hanesan manan na’in, apresia inisiativa husi guvernu liu husi SEKOMS tambá bele inisia programa refere atu foo motivasaun ne’ebé di’ák liu tan bá jóvem talentioju sira.
‘’Ami apresia tebes bá inisiativa husi VIII guvernu konstitusionál liu husi SEKOMS tambá bele inisia programa ne’e no atu motiva jóvem talentioju sira iha area videomaker, youtubers no liu-liu oinsa atu kontribui ba promosaun turízmu lokál no oinsa atu ita kombate Covid-19 no kontra HOAX iha ita nia rai Timor leste’’. Espressa Bourdalónia.
Fontes ne’e, foo moos nia esperánsa bo’ot bá SEKOMS atu nune’e tinan-tinan bele organiza nafatin kompetisaun ne’e hodi foo oportunidade ba jóvem sira atu esplora kreatividade.
‘’Hanesan manan na’in da-ruak, iha esperansa bo’ot ba SEKOMS atu tinan-tinan bele organiza nafatin kompetisaun ne’e hodi foo oportunidade diak liu tan ba jóvem sira atu esplora moos sira nia kreatividade, liu-liu liga ho situasaun ohin loron ne’ebé ita hasoru’’. Haktuir nia.
Lia-maktakan (enserramentu) husi SEKOMS, esklarese, guvernu kontente ho jóvem sira ne’ebé iha kreatividade hodi kontribui bá dezenvolvimentu.
‘’Guvernu kontente ho ita bo’ot sira hanesan jóvem ne’ebé iha kreatividade hodi kontribui bá ita nia dezenvolvimentu nasaun, liu husi talentu ne’ebé ita bo’ot sira iha no bá sira ne’ebé mak seidauk hetan iha oportunidade ohin, kontinua no parte guvernu sei apoia’’. Esklaresimentu SEKOMS, Merício Juvinál dos Reis ‘’AKARA’’ bainhira enserra kompetisaun refere.
Entertantu, kompetisaun ne’ebé loke husi SEKOMS, kontestante mai husi grupu no organizasaun oi-oin hamutuk 80 resin, no finalmente iha de’it manan na’in hamutuk 6, mak hanesan Jilo Expostu (1°), Community CS15 (2°), Nicko Gama (3°), Adde Xavier (4°), Cilia R (5°), Romário Marçal (6°).
Jornalista : Arménio.
loading="lazy" />