Saneamentu Dili ladauk raut foer kuaze semana ida

G-NEWS (DILI) – Ekipa Saneamentu Munisípiu Dili seidauk bele raut foer iha lixeiru sira, hodi implika fatin públiku nakonu ho foer ne’ebé namkari.

Rezidente ida iha Pantai Kelapa (Área IOB) Afonco Xavier, ba G-News, sente triste ho lixu ne’ebé to’o oras ne’e seidauk bele raut, hodi rezulta fatin públiku foer no is.

Nia dehan, tuir loloos ekipa Saneamentu munisípiu Dili tenke raut ona, tanba ho foer sira rai hamutuk, kuandu udan, sei halo fatin públiku foer tán, no halo intupidu ba bee dalan.

“Bain-bain iha dádersan, ekipa Saneamentu Dili mai raut ona, maibé hare semana ida ne’e nia laran, sira la mai raut, entaun agora lixu nakonu loos. Buat sira ne’e halo fatin públiku ne’e dois”, Afonço esplika.

Alende ne’e, iha estrada Diresaun Tasi-Ibun Pantai Kelapa ba Merkadu Comoro mós nakonu ho lixu ne’ebé namkari iha estrada públiku.

Estudante Akadémika IOB Armando Pinto, Segunda-Feira (03042023) dáder ne’e informa ba G-News katak, sente triste ho foer sira ne’ebé okupa iha estrada públiku, hatudu imajen la diak ba sosiedade, no vizitante sira hosi rai-liur.

“Ita husu ba Autoridade Munisípiu Dili atu responsábiliza, hodi raut foer sira, se lae, ita nia fatin públiku sira ne’e nakonu ho foer, hatudu imajen la diak”, Armando haktuir.

Iha parte seluk, sidadaun ida Roberto Soares, iha Pantai-Kelapa hateten, sente triste, no Governu tenke tau matan ba problema ne’e, ho foer sira ne’ebé nakoku, bele hatudu imajen la diak ba sosiedade, no dó impaktu mós ba Saúde ba labarik sira ne’ebé hela besik lixeiru públiku.

“Se ita dehan Saúde iha ita nia liman rasik, maibé fatin públiku ne’ebé nakonu ho foer no is, ne’e estraga ita nia saúde, liu-liu labarik sira ne’ebé hela besik fatin lixu”, Roberto esplika.

Antes ne’e, Xefe Departamentu Servisu Saneamentu Munisípiu Dili Domingos Seriano hateten, autoridade munisípiu Dili tinan ne’e seidauk iha orsamentu atu selu kompanha lima ne’ebé kontratu hodi raut fo’er iha postu Administrativu 4 iha munisípiu Dili.

Tuir observasaun G-News iha kapitál Dili, liu-liu fatin públiku balun, nakonu ho lixu. Kuandu udam, lixu hirak ne’e sei namkari, no tenke taka bee dalan sira, no intupidu, ikus mai hamosu engrafamentu.

Jornalista G-News mós tenta atu konfirma ho Prezidente Autoridade Munisípiu Dili Guilhermina da Silva, kona-ba problema ne’e, maibé seidauk hetan konfirmasaun.

Jornalista            : Ekipa G-News

Editór Testu        : Amito Qonusere Araújo