Sansão Gomes Lori Juventude Atsabe 100-resin Apoiu Horta-Xanana

Jornalísta : Arménio //

G-RTV.com (Dili) : Timor-oan ne’ebé kuaze tinan 5 ikus ne’e, la’o hamutuk ho líder nasionál Kay Rala Xanana nia viázem karitativa, Sansão Gomes lori juventude Atsabe-Oan (Ermera) 100-resin apoiu Kandidatu Prezidente Repúblika (PR)  2022-2027, José Ramos-Horta no Prezidente CNRT, Kay Rala Xanana Gusmão kaer guvernu.

Iha deklarasaun apoiu ne’e, Sansão Gomes deklara, fiar juventude ne’ebé hanaran-án Brigada Juventude Atsabe (BJA) nia korázem atu apoiu Horta maske iha diferensa polítika.

‘’ Estudante no jóvem sira ,  imi  iha korázem maka’as, maske dalaruma liña polítika ita diferente oituan maibé, 19 Marsu agora, Horta tenke manan iha postu-administrativu Atsabe (Ermera,) ne’ebé, ha’u fiar imi sei halo servisu ida ne’e husi uma ba uma (Dor to Dor)’’, Dehan Sansão Gomes iha Elem-Loi (Dili), 26/02/2022.

Husi Dor to Dor ne’e, emprezáriu Sansão ne’ebé mai husi rai Atsabe-oan, afirma, importante liu mak fó koñesimentu númeru 14 husi kandidatu CNRT, Ramos Horta nian, nune’e ita lori kandidatu ne’e sai vensedór iha eleisaun prezidensiál ida ne’e.

Emprezáriu ne’e, perante audénsia, klarifika kedas katak, sei la promete buat barak, maibé konta ho nia apoiu ba buat ruma ne’ebé presija tulun.

Iha serimónia deklarasaun apoiu ne’e, hala’o mós konferénsia imprensa husi BJA hodi hato’o sira nia razaun pozisaun polítika ne’e.

‘’Hare bá impasse polítika ne’ebé mosu iha 2017-2021, hodi halo instutisaun estadu la funsiona ho di’ák, ekonomia monu, dignidade povu nian iha mundu monu aumenta ho aktu viola konstituisaun, nune’e, tenke hare lideransa ida ne’ebé iha integridade, vizionáriu no iha pezu hodi influénsia mundu, nune’e, BJA deklara katak depozita konfiansa bá Dr. José Ramos-Horta sai PR liu husi eleisaun tinan ne’e’’, Deklara Porta-vóz, Rogerio Dos Santos.

Razaun ne’ebé lori sira atu apoiu José Ramos-Horta mak sei repozisiona órdem demokrátiku konstitusionál ne’ebé violadu, hatur hikas dignidade povu iha Mundu,  uja kompeténsia PR tuir konstituisaun no sei la sai opozisaun ba guvernu ne’ebé de’it sei mai.

Sira mós husu ba inan-aman sira, iha loron 19/03 tinan ne’e, keta haluha vota José Ramos-Horta ne’ebé indika husi Líder Karrimátiku, Kay Rala Xanana Gusmão ho nia partidu CNRT iha númeru sorteiu 14.

Juventude hirak ne’e mós garante Horta sei manan iha Atsabe no apoiu ne’e sei kontinua ba Kay Rala Xanana Gusmão hodi kaer guvernu iha períodu eleisaun parlamentár tuir mai.

Iha fatin hanesan, Sekretáriu Jerál (SEKJE) Interinu CNRT, nu’udár mós ekipa sussesu José Ramos-Horta nian, agradese bá konfiansa tomak husi juventude BJA.

‘’Ha’u lori Maun Bo’ot Ramos Horta no Maun Bo’ot Kay Rala Xanana Gusmão, agradese bá imi nia konfiansa, imi nia determinasaun no vizaun polítika ne’ebé ás, hakuak bo’ot husi ha’u no Maun Bo’ot na’in rua ba imi hotu’’, Lia agradesimentu husi SEKJE Interinu, Jacinto Rigoberto nu’udár mós Atsabe-oan.

‘’Ho imi nia hamutuk hanesan ne’e, ita halo diferensa iha tinan ne’e, ha’u fiar katak Atsabe kaixa sei la mamuk ba kandidatu José Ramos-Horta’’, Espressa Jacinto.

Entretantu, Juventude ne’ebé halibuar-án iha BJA, maioria mai husi estudante no votante foun sira hodi deside fó apoiu ba kandidatu prezidente ho númeru sorteiu 14. (REMATA)