Semana Da-Ruak Serka Sanitária, PNTL Dili Agradese Ba komunidade.

G-RTV NEWS : PNTL Munisípiu Dili hala’o extra esforsu hamutuk ho SIJK no Forsa tarefa konjuntu sira durante Semana rua konabá seguransa Serka Sanitária no konfinamentu Obrigatóriu ne’ebé Guvernu Deside ba Munisípiu Dili hahú loron 8 Fulan ida ne’e to’o Loron 2 Fulan Abril Tinan ne’e tamba númeru Kazu detetadu COVID-19 ne’ebé  loron ba loron kontinua ezíste.

‘’ Durante Serka Sanitária no konfinamentu Obrigatóriu iha Munisípiu Dili, PNTL Munisípiu kordena ho ekipa forsa tarefa sira nível Munisípiu no Nasionál, atu bele garante sidadaun sira atu bele kumpri regra sira konabá serka sanitária hanesan uja máskara, labele halibur malu iha ema barak, no distansiamentu sosiál ‘’ dehan Super. Polísia Ecludes Da Costa Belo iha nia kna’ar fatin, Komandu PNTL Munisípiu Dili ( 22/03/2021).

Ema númeru rua iha Komandu PNTL Munisípiu Dili esklarese liu tan katak ‘’PNTL Munisípiu kontinua sensibiliza merkadu sira, tamba ida ne’e difisíl ho razaun medida merkadu ne’ebé ki’ik.  PNTL Munisípiu hetan apoiu máskara husi Ministériu Interior fahe máskara ba sidadaun sira iha merkadu no hetan mós apoiu husi Movimentu Tasi moos atu dezinfekta fatin públiku no instituisaun sira, liu-liu instituisaun Média nian’’.

Konabá Postu PNTL destakadu iha pontu entrada mai Munisípiu Dili, PNTL Munisípiu Dili hetan apoiu husi Cruz-Vermelha konabá Tenda :

‘’ Komandu PNTL, hetan apoiu tenda husi Cruz Vermelha, ba hahan husi SIJK, no kada postu, iha membru ema na’in husi 10 to’o 15 mak destaka iha ne’ebá ba óras 24,  maibé difikuldade mak rádiu komunikasaun’’ haktuir nia.

Euclides Belo realsa liu tan katak ‘’ Agradese ba Komunidade sira ne’ebé durante ne’e apoiu ba membru destakadu sira iha pontu entrada liu-liu apoiu ba sanitasaun nian durante óras 24 tamba postu destakadu sira la iha sanitasaun’’.

Iha fatin hanesan, Fontes ne’e mós klarifika katak kazu ne’ebé virál iha Media sosiál iha loron rua liu bá konabá Jovém sira baku Jóvem na’in rua iha Area Suku Madohi, Postu Administrativu D. Alexo, no iha informasaun katak vítima ida mate, maibé komadante ne’e klarifika katak la rezulta ema mate no nia prossesu kapturasaun ba suspeitu sira la’o hela.

Jornalista : Julio Paixão.

Editór : Arménio.