G-RTV News (15/05/2021): Sidadaun ida Ho Inisiál FS (56) nu’udár funsionáriu mekánika iha offisina Diamond mate ho Covid-19 iha Fatuhada.
Tuir sasin katak iha óras dadér mais ou menus tuku 8:00, rona kalem tarutu iha matebian nia fatin, hare matebian tur sadere hela.
‘’Iha tempu dadér ha’u fase ropa, derrepente ha’u rona kalem tarutu, ha’u tama ba, matebian tur hela, no haruka ha’u fui bee, no bainhira hemu, nia sei hakmumu uluk no tafiu, hafoin ida ne’e nia laran sa’e atu muta, la kleur haruka ha’u bolu família, no tama mai, matebian ís kotu’’. Haktuir sasin Inas de araujo Alves iha fatin akontesimentu offisina Diamond Workshop, Fatuhada, Munisípiu Dili.
Iha fatin hanesan kordenadór pilar III, Carlito Freitas, informa katak tuir istória ne’ebé matebian nia fen-kaben fó katak antes ne’e matebian sofre moras fuan.
‘’Tuir informasaun ne’ebé matebian nia kaben fó katak, antes ne’e nia moras fuan, no sente arraska bainhira hemu bee malirin, faktus katak iha duni bee malirin hatuur hela iha matebian nia sorin’’. Informa Carlito.
Carlito reforsa moos, tuir rezultadu teste husi Laboratórium Nasionál katak matebian iha duni Covid-19 iha nia Isin nune’e konsidera matebian mate ho Covid-19.
‘’Bainhira matebian ís kotu, Ekipa Covid-19 halo teste, no husi rezultadu teste Laboratórium nian hatudu, matebian mate ho Covid-19 iha isin, nune’e prossesu ba oin hamutuk ho ekipa óbitu nian, sei la’o tuir regra protokolu Covid-19, ba dala uluk, ohin ita sei transporta ba iha Vera-Cruz hodi tau iha konzeladór, aban (16/05) mak família sei lori no ba hakoi iha nia rai moris fatin’’. Reforsa Carlito.
Iha Offisina Diamond, matebian hala’o funsaun hanesan pintór hodi pinta karreta, ho nia durasaun servisu kuaze tinan 4.
Matebian ‘’FS’’ husi Munisípiu Lautém, Postu-Administrasaun Lautém, Suku Mahina II, husik hela Fen no oan na’in Tolu.
Jornalista : Arménio.
loading="lazy" />