Simu Rezultadu ELPR, Lú Olo : ‘’Ha’u Nia Vida Polítika Seidauk Hotu’’

Jornalísta : Arménio //

G-RTV.com (Dili) : Hafoin hetan rezultadu iha segundu volta eleisaun prezidensiál 2022, ne’ebé la konsege hetan votu maioria, kandidatu ho númeru sorteiu 2, Francisco Guterres Lú Olo simu rezultadu ho haksolok.

‘’Povu doben timor Leste, rezultadu eleisaun prezidensiál (ELPR) segunda volta, hatudu ona katak José Ramos-Horta mak sei sai Prezidente Repúblika (PR) 2022-2027, ne’e mak vontade povu nian, espressa liu husi buletím votu, ha’u simu votu rezultadu eleisaun ho laran hakmatek no ksolok tambá povu rasik mak hili nia PR, parabéns ba Horta, Prezidente eleitu, ha’u fiar katak sei kopera ho instituisaun estadu sira,’’ Espressa atuál Prezidente RDTL, Francisco Guterres Lú Olo, ne’ebé G-RTV.com assesu liu husi Pájina Offisiál média sosiál kandidatu, iha sede nasionál Kandidatura, Lecidere, 22/04/2022.

Nia saliente liu tan, ‘’Parabéns ba povu Tomak ne’ebé hatudu nia maturiedade polítika, hametin páz, trankuilidade iha tempu kampaña no eleisaun remata,’’ Tenik Nia.

Konabá vida polítika hafoin ses husi kargu Prezidente Repúblika, Lú Olo hatan, Nia Vida polítika seidauk remata, hodi prepara FRETILIN ba eleisaun parlamentár.

‘’Nu’udár sidadaun ha’u nia vida polítika seidauk hotu, singnifika ha’u sei hateke ba do’ok’’’ Dehan eis-prezidente parlamentu nasionál ne’e.

Além ida ne’e, Lú Olo mós agradese ba partidu polítiku ne’ebé apoiu nia kandidatura iha primeira no segunda volta, organizasaun apoiante, grupu no ema hotu ne’ebé suporta nia iha eleisaun prezidensiál 2022.

Kandidatu ho númeru sorteiu 2, ne’e fó mós apresiasaun bá órgaun eleitorál, Seguransa no defeza. Observadór, fiskais sira hotu ne’ebé organiza no assegura ho di’ák eleisaun prezidensiál 2022 to’o remata.

Entretantu, tuir rezultadu apuramentu final husi STAE, kandidatu prezidente ho númeru sorteiu 1, José Ramos-Horta, konfirma ho votu maioria, totál 397.145 (62.9%) hafoin kandidatu Francisco Guteres Lú Olo tuir  ho Votus 242.440 (37.91%).

(REMATA).