G-NEWS (DILI) – Governu Singapura deside apoiu Timor Leste atu sai membru ba Organizasaun Rejionál ASEAN.
Komprimisu polítika ne’e hato’o hosi Primeiru Ministru Singapura Lee Hsien Loong, hafoin hasoru malu ho nia omólogu Taur Matan Ruak foin lalais ne’e.
Iha pájina ofisial Xefe Governu Singapura Lee Hsien Loong hateten, Singapura iha komitmentu hodi apoiu Timor Leste nia preparasaun sai membru ba Organizasaun ASEAN.
“Ha’u fiar katak ita nia relasaun bilateral kontinua hametin tinan sira tuir mai”, PM ne’e sita iha nia pájina ofisial ne’e.
Lee Hsien Loong reafirma fila fali relasaun amizade ne’ebé diak tebes entre Singapura no Timor Leste, hafoin hetan vizita hosi Prezidente Repúblika José Ramos Horta iha fulan Dezembru tinan 2022.
“Ida ne’e hanesan tempu ativu tebes espesial ba Timor Leste nia envolvimentu iha área refere. Iha inísiu fulan ne’e, ba-dala uluk Timor Leste partisipa iha forum Ministériu Negósiu Estranjeiru ASEAN nian nu’udar observador. Ida ne’e hanesan istória ne’ebé istóriku tebes”, tenik Xefe Governu Lee.
Entertantu, Timor Leste iha ambisaun bo’ot atu sai membru Organizasaun Rejioná ne’e. Tinan tolu liuba, ekipa hosi ASEAN mai halo ona observasaun jerál ba polítika, seguransa no defeza, ekonómia, kultural no asuntus seluk tan, nune’e bele aprezenta relatóriu iha forum ASEAN nian, nune’e membru sira bele foti desizaun ba adezaun Timor Leste nian.
Iha tinan 2022, Lideransa sira hosi ASEAN deside ona fo estatus observador ba Timor Leste atu bele partisipa iha forum ASEAN nian, maibé seidauk fo autorizasaun ba direitubde votu.
Jornalista: Ekipa G-News
Editór Textu: Amito Qonusere Araújo
loading="lazy" />