G-NEWS (DILI) – Sidadaun sira lamenta ho lentidaun Sistema 3E iha territóriu Nasionál ne’ebé afeta ba kliente EDTL bainhira sosa pulsa eletrisidade.
Sidadaun ida via telefone iha Munisípiu Covalima ba G-News, Sexta-Feira Dáder ne’e katak, iha dáder ne’e nia parte ba sosa pulsa EDTL maibé labele asesu diak tanba sistema la diak.
“Irmaun, ohin dáder Ha’u oan mane ba sosa pulsa EDTL, maibé dehan sistema ka internet la diak”, nia informa.
Nia aumenta tán katak, laos sistema ka internet mak sai problema, maibé kuaze ke ahi sempre mate, afeta ba sasan eletrónika hetan avária.
” Se situasaun nune’e bebeik, ita ulun moras. EDTL agora ne’e empreza públika, tanba sá mak problema ne’e sempre akontese”, nia hakotu.
Problema sistema 3E la diak tanba lentidade laos akontese iha Munisípiu sira, maibé akontese iha territóriu Nasionál. Nune’e EDTL Nasioná alerta kedan informasaun ba públiku ho faillansu tékniku ne’ebé akontese.
“Hakarak informa bà Konsumidor sira iha territóriu laran tomak katak, tamba Instabilidade rede internet rezulta bà sistema 3E hodi halo lentidaun wainhira sosa pulsa eletrisidade. No bà kliente sira ne’ebè lokaliza iha munisípiu Dìli, bele mai sosa token enerjia/Pulsa eletrisidade iha edifísiu sentral Kaikoli”, Informasaun ne’e G-News asesu iha pájina ofisial EDTL. EP nian, Sexta-Feira (29032023).
Ho fallansu ne’ebé akontese, Ekipa EDTL.E.P esforsu halo manutensaun hodi reativa hikas sentru venda hotu, nune’e husu bá parseria EDTL nian atu pasíensia hodi hein prosesu tomak.
Jornalista : Ekipa G-News
Editór Testu : Amito Qonusere Araújo
loading="lazy" />