Tambá Estabilidade Nasionál, Vendedór Sira apoiu LAT ho númeru sorteiu 8

Jornalísta : Arménio //

G-RTV.com (Dili) : Vendedór ambulánte, ai-leba no ain tanan iha bidau ho inisiativa deklara nia apoiu ba kandidatura Tenente Jenerál (REF.), Lere Anan Timur (LAT) bá Prezidente Repúblika períodu 2022-2027 liu husi eleisaun prezidensiál 19 Marsu 2022.

Vendedór ambulante sira konsidera katak kandidatu LAT  mak bele assegura unidade nasionál ho esperénsia hanesan jenerál iha forsa armada F-FDTL durante tinan 20 resin.

‘’ Ami Vendedór, ai-leba no ain tanan fó apoiu máxima ba kandidatu LAT ho razaun, Jenerál LAT mak bele assegura unidade nasionál  iha períodu tinan lima mai tambá durante assume kargu hanesan Xefe Estadu Maior Jenerál konsege assegura estabilidade nasionál maske ho ímpase polítika’’, Deklara porta-vóz Fernando F. Gama iha konferénsia Imprensa ne’ebé hala’o iha Bidau Santa Ana (Dili), 20/02/2022.

Sira mós fiar katak, LAT iha potensialidade bo’ot atu unifika líder nasionál sira ne’ebé iha diverjénsia polítika liu husi diálogu nasionál.

Porta-vóz afirma liu tan, alerjia ona ho polítiku inklui partidu polítiku (PARPOL) sira ne’ebé hakarak hatun no hasa’e malu, sobu malu tambá de’it sira nia interese.

‘’Ami alerjia ona ho polítiku no PARPOL sira ne’ebé hatun no hasa’e malu, sobu malu tambá de’it sira nia interese, ami sente duni impasse polítiku ne’e tambá fo efeitu negativu barak inklui fan ikan moos la folin’’, afirma porta-vóz.

LAT nia prezensa iha vendedór sira nia matan, sei lori esperánsa foun hodi bele fó tempu ba Guvernu atu hadia ekonomia rai-laran.

Entretantu, LAT hanesan Tenente Jenerál F-FDTL ne’ebé reforma iha fulan Fevereiru 2022 hodi kandidata-án ba Prezidente Repúblika, nune’e iha semana hirak liu bá liu husi Tribunál hetan númeru sorteiu iha órdem buletím votu ho númeru 8. (REMATA)