Jornalísta : Arménio //
G-RTV.com (Dili) : Ohin, Primeiru Ministru (PM) Taur Matan Ruak hasoru malu ho Tenente Jenerál Reformadu, Lere Anan Timur (LAT) ne’ebé iha tempu kampaña prezidensiál hanaran-án ‘’Oan Kiak FRETILIN’’.
Kuaze oras ida resin iha hasoru malu ne’e, Taur afirma, vizita ne’e hanesan maun ho alin no parabeniza LAT.
‘’Hanesan maun-alin mai kumprimenta malu de’it no parabéns tamba bele kontribui ba sussesu eleisaun’’, dehan Taur Matan Ruak hafoin hasoru malu iha rezidénsia LAT, Faról (DILI), 21/03/2022.
Iha Fatin hanesan, LAT ne’ebé akompaña husi nia espoza, esplika konabá hetan vizita husi atuál Primeiru Ministru Taur Matan Ruak nian iha nia rezidénsia.
‘’Ohin Taur mai, ne’e la’ós PM mak mai, maibé ne’e hanesan alin mak mai, tambá nia hatene katak ha’u la passa ba prezidente, hanesan alin mai solidariza, ami la iha assuntu seluk’’, esplika LAT.
Nia mós esklarese katak, sei la akontese problema husi nia militante no simpatizante bainhira rona rezultadu final.
‘’Sira sente la konfortável, maibé hau komprenede katak nasaun ne’e ita mak harii nune’e la iha problema, ita servisu hamutuk, ita nia demokrasia tenke buras, labele buras ho osan no lia-bosok’’, Esklarese atuál kandidatu prezidente repúblika 2022-2027.
Iha kontájem votu provizóriu, iha possibilidade bo’ot sei akontese II volta, eleisaun prezidensiál 2022 ne’ebé sei avansa husi Lú-Olo no Ramos Horta, nune’e to’o oras ne’e LAT seidauk iha pozisaun.
‘’Ha’u seidauk responde tambá ha’u kolen, foin lalais (Kampaña) ha’u mesak mak la’o, hanesan babain ha’u dehan, ha’u oan-kiak, la’o mesak-mesak, ha’u sei hanoin’’, Deklara LAT.
Nune’e mós, antes ne’e, iha parte dadér, Tuku 8:00–resin, atuál Sekretáriu Jerál FRETILIN, Mari Alkatiri bá vizita mós LAT iha nia rezidénsia maibé Jenerál Reformadu ne’e la iha tempu.
‘’Ohin ha’u la iha tempu tambá ha’u sai tiha ba liur no nia kontinua karik mai tan, nu’udár sekretáriu jerál FRETLIN, ita sei hare’’, konfirma LAT.
LAT oras ne’e dadaun, sai kandidatu ida iha eleisaun prezidensiál 2022, no iha loron votasaun ne’ebé hala’o iha sabadu foin lalais ne’e, rezulta LAT lidera munisípiu Lautém nu’udár nia rai-moris fatin ho totál, 11,281 votus (31,62%). (REMATA).
loading="lazy" />