Jornalísta : Arménio //
G-RTV.com (Dili) : Partidu Libertasaun Popular (PLP) lideradu husi atuál Primeiru Ministru Taur Matan Ruak hala’o enkontru alargada ho estrutura nasionál no munispál hodi koalia konabá pozisaun PLP iha eleisaun prezidensiál tinan ne’e.
Iha enkontru alargada ne’ebé hala’o, iha loron 24/02/2022, fatin sede nasionál Metiaut (Dili), PLP deside atu estrutura no militante sira vota ho konsiénsia maske fundadór no prezidente partidu PLP nia espoza rasik kandidata-án.
‘’Pozisaun PLP nian ba partisipante sira katak eleisaun prezidensiál agora, estrutura no militante sira ho konxiénsia rasik, deside bele vota ba kandidatura se de’it, maibé mantem obedese ba orientasaun ne’ebé esklaresidu ona iha enkontru’’, Haktuir prezidente Interinu PLP, Abrão José Freitas ‘’ Mate-Resto’’ liu husi komunikadu ne’ebé G-RTV assesu ohin.
Nia hatutan tan, PLP nia hanoin atu militante sira apoiu kandidatu ida ne’ebé hanoin ba oin.
‘’PLP nia pozisaun bá apoiu kandidatura ida ne’ebé atu hanoin bá oin, hadia nasaun no povu nia moris diák, la’ós hili fali kandidatu ida ne’ebé kria instabilidade iha ita nia rain’’, dehan Abrão.
Entretantu, maske Laen lidera partidu PLP maibé la singnifika sai garantidu ida atu apoiu fen nia kandidatura, ida ne’e mak akontese bá Taur Matan Ruak ho nia espoza Isabél Fereira ne’ebé sai mós hanesan kandidata prezidente repúblika 2022-2027 ho númeru sorteiu 1.
To’o oras ne’e, G-RTV.com sei tenta atu entrevista ho Primeiru Ministru Taur Matan Ruak konabá nia pozisaun no iha possibilidade atu tuir atividade kampaña nia espoza nian. (Remata)
loading="lazy" />