Xanana Fó Apoiu Umanitáriu Ba Vítima Inundasaun Covalima, Ana : Obrigadu No Saúde Di’ák Nafatin

Jornalísta : Arménio //

G-RTV.com ( Covalima ) : Hafoin Akontese inundasaum iha Munisípiu Covalima iha loron 30 fulan Juñu ne’e, Líder Nasionál Kay Rala Xanana Gusmão orienta ekipa iha Dili hodi fó apoiu umanitáriu ba vítima sira.

“Hafoin rona inundasaun, Avô Xanana iha rai-liur, orienta kedas atu mai halo verifikasaun urjente no ikus mai ohin bele fahe ba imi apoiu ruma tuir kbi’it ne’ebé iha, ami la kompleta nessidade hotu maibé ne’e mak forsa Avô Nana ho ekipa nian” Dehan Reprezentante Xanana, Virgílio Smith hafoin entrega apoiu umanitáriu ba família afetadu sira iha Munisípiu Covalima, Kuarta Ohin, 06/07/2022.

Iha fatin hanesan, Benefisiáriu ne’ebé hetan ajudu ne’e sente kontente ba líder nasionál nia laran luak.

“Obrigadu Avô Nana no Avô Ramos, Saúde diak nafatin, no kontinua tau matan ba ami povu sira”, espressa Ana Barros nu’udár reprezentante vítima ne’ebé hetan ajudu iha aldeia Loro, Postu Administrativu Suai-Villa, Munisípiu Covalima.

Roberto Amaral nu’udár komunidade aldeia uma-ikun, suku Loro reforsa tan, ” Ami nia obrigadu ba Avô Nana no ekipa ne’ebé la’ós foin de’it mak ajuda ami, maibé iha tempu susar tinan hirak ne’e sempre tulun ami povu,” Reforsa nia.

Iha sorin seluk, Hilario Mendonsa ne’ebé lakon nia plantasaun batar no foremunggu kuaze hektares rua resin iha  inudasaun ne’ebé akontese iha loron 30/06, aldeia Meop, Suku Labarai (Suai-Villa), esplika, sente triste ho situasaun ne’e.

“Sente triste ho situasaun ne’e, la iha servisu ruma, ida ne’e mak ami nia servisu, rezultadu husi toos mak bele sustenta família. Maibé ho prezensa ajuda husi avô Nana, barak ka oituan ne’e ami simu ho kontente,” Tenik Hilario.

Tuir dadus, benefisiáriu ne’ebé hetan tulun husi líder karrismátiku Xanana Gusmão nian, iha  aldeia afetadu suku Loro hamutuk lima mak hanesan aldeia Loro no Lo’o totál 279 benefisiáriu, kontinua ho aldeia mane-ikun totál 128, aldeia akar-laran hamutuk 40 benefisiáriu nune’e mos iha suku Labarai ho aldeia rua mak Holba no Meop hamutuk 51 benefisiáriu no ikus liu aldeia balun iha Postu Administrativu Tiliomar hamutuk kuaze 20 resin ne’ebé ekipa husi Eis-Prezidente Repúblika seidauk identifika ho didi’ák.

Tulun ne’ebé Eis-Primeiru Ministru ho nia ekipa oferese ba vítima sira mak hanesan Fos, Mina ba tein ( Halo Modo), supremi no kulsaun balun ne’ebé fó espesiál ba idozus no ema ho difisiénsia sira.

Ajudu ne’ebé hanesan, tuir informasaun ne’ebé G-RTV.com assesu, Ekipa Xanana sei distribui mos ba vítima inundasaun sira seluk iha munisípiu Manufahi, Vikeke no Lautém.

Entretantu, dadus nasionál ne’ebé fó sai husi diresaun Dezastre  Naturais Nasionál-SEPC relata iha Munisípiu Covalima, dadus provizóriu ba akontesementu inundasaun iha Postu- Administrativo mak Hanesan :

1. Postu Suai-Villa uma kain 127, kompostu husi suku kamenasa uma kain 6, suku suai loro uma kain 98, suku debos uma kain 1, suku labarai uma kain 2 no suku beco uma kain 20.
2. Postu Tiliomar uma kain 29 kompostu husi suku lalawa uma kain 4 no suku beiseiuk uma kain 25
3. Postu Maucatar uma kain 23, kompostu husi suku belakasak uma kain 14 no suku matai 9.

(REMATA).