G-RTV News (09/04/2021) : Bainhira remata vizita ba refuziadus sira ne’ebé refuzia iha Bairro Maria Auxiliadora, Suku Komoro, Munisípiu Dili, líder nasionál Kayrala Xanana Gusmão, sa’e ba laletek foho Fatu-banku, atu partisipa serimónia kultural tuir tradisaun Timor nian ho objetivu hamulak atu hamenus Bee iha Lagoa Tasi-Tolu.
Abilio da Costa Tasirade nu’udár lia-na’in husi Tasi-Tolu, Uma Lisan Malalu, Dili haktuir katak :
‘’Serimónia ohin ho objetivu atu tahan Avô Lafaek sira iha lagoa Tolu ne’e, hodi evita Bé kontinua sa’e atu salva ita nia populasaun sira iha Bairro 14 ne’ebé haleu Lagoa Tasi-Tolu’’. Haktuir lia-na’in.
Konabá Na’an aten, lia na’in ne informa katak, ‘’Na’an-aten ne’e hatudu sinál di’ák maibé presija lori tempu atu supa sai bee’’.
Lia-nain ne’e husu mós ba komunidade sira atu labele liu iha dalan ne’ebé oras ne’e utilija atu evakua komunidade no ajudu umanitáriu iha area ne’ebé babain uja ba serimónia ofisiál nasaun nian iha Tasi-Tolu, ‘’ha’u husu atu labele utilija fatin ne’e, tamba ne’e odamatan, se lae fanun Avô lafaek sira no Bé sei susar atu maran’’.
Iha fatin hanesan, Xanana hato’o katak Nia hakarak partispa iha serimónia refere tamba atu husu matak malirin ba forsa natureza hodi bele rezolve situasaun emerjénsia ne’ebé komunidade iha area lagoa Tasi-tolu infrenta ‘’rituál ne’e hau hakarak mai tamba aban ita sei mai ho ekipa atu oinsa bele supa sai bee ne’e ba tasi, ne’e duni ita husu ba forsa natureza atu intervem hamutuk ho Maromak nia tulun ita bele hamaran lalais atu labele fo risku ba populasaun’’, Eis-Prezidente ne’e deklara.
Iha serimónia kulturál ne’ebé ohin (09/04) realiza, inisiativa mai husi lia-na’in no komunidade sira atu bele hases sira husi dezastre ne’ebé sira hasoru liu-liu buka dalan atu bee labele kontinua sa’e.
Iha fatin hanesan, antes Kayrala Xanana hakat ba iha fatin serimónia kulturál, kuaze óras 4, Xanana hamutuk ho komunidade sira hodi haré besik, saida mak sira infrenta iha Bairro refere relasiona ho udan ne’ebé hamosu inundasaun iha loron 04 fulan ida ne’e.
Jornalista : Arménio.
‘’Família Bo’ot Kompanhia GARDAMOR hato’o solidariedade ba Família afetadu ba Inundasaun iha Territóriu Nasionál , liu-liu iha kapitál Dili, ne’ebé akontese iha loron 04/04/2021, Forsa nafatin ho korázem tomak, atu ita hotu bele ultrapassa situasaun difísil ida ne’e’’.
loading="lazy" />