Xefe Aldeia Patrísiu : ‘’Balun Mai Tanis Husu Ajuda, Maibé, Ho De’it Saláriu $100 Ami Atu Fo Oinsa?’’

G-RTV NEWS  : Tuir Xefe Aldeia Loron-Matan, Suku Madohi haktuir ho triste katak husu ba Guvernu atu tau hahan ruma ba estudante sira.

‘’ Tamba Serka Sanitária no Konfinamentu Obrigatóriu estudante sira iha hau nia area autoriedade aldeia nian, sente hamlaha, nune’e ho triste ha’u husu ba Autoriedade Nasionál atu fahe hahan ba sira’’ haktenik  Patrísiu da Silva iha Kna’ar Fatin Aldeia Loron-Matan, Postu Administrativu D. Alexo, Munisípiu Dili ( 20/03/2021).

Fontes ne’e akresenta katak ‘’Ajudu hirak ne’ebé Guvernu prepara, tarde Ona,  tamba sira la aguenta ho Serka ne’e iha Semana rua nia laran, balun mai tanis husu ajuda, maibé kuitadu, ho de’it saláriu $100 ami atu fo oinsa?’’haktuir nia.

Autoriedade Aldeia  informa mós katak,  Autoriedade Nasionál fo ona  orientasaun ba Autoriedade Suku no Aldeia, atu bele rezista estudante ka juventude sira ne’ebé hela iha Kos iha Munisípiu Dili durante serka Sanitária no konfinamentu Obrigatóriu.

Xefe Aldeia ne’e afirma liu tan katak ‘’ Situasaun ne’e emerjénsia nune’e lalika dada naruk atu guvernu atende situasaun ne’e’’.

Iha fatin hanesan, Tuir Estudante husi  RAEOA ( Oecusse)  ne’ebé hela iha Kos hateten katak ‘’Ami agora La iha Ona Ai-han, Pulsa Eletridade la Iha, nune’e husu ba Guvernu atu Urjentemente iha semana ida ne’e bele responde Ami nia nessesidade hirak ne’e’’ klarifikasaun husi Estudante refere.

Jornalista : Júlio Paixão.

Editór : Arménio.